தஞ்சாவூருக்கு முதல்வர் மு.க.ஸ்டாலின் இன்று வருகை: கல்லணையிலிருந்து தண்ணீரை திறந்து விடுகிறார்

தமிழக முதல்வர் மு.க. ஸ்டாலின் இருநாள் பயணமாக தஞ்சாவூருக்கு ஞாயிற்றுக்கிழமை வருகிறார்.

- 

தஞ்சாவூர், ஜூன் 14: இதற்கான ஏற்பாடுகள் தீவிரமாக மேற்கொள்ளப்பட்டு வருகின்றன.

சென்னையிலிருந்து முதல்வர் மு.க. ஸ்டாலின் திருச்சிக்கு விமானம் மூலம் ஞாயிற்றுக்கிழமை நண்பகல் 12 மணிக்கு வருகிறார். பின்னர், சாலை மார்க்கமாக வரும் அவர் மாலை 6 மணியளவில் டெல்டா பாசனத்துக்காக கல்லணையிலிருந்து தண்ணீரை திறந்து விடுகிறார்.

இதையடுத்து, தஞ்சாவூருக்கு வரும் முதல்வர் சுற்றுலா மாளிகையில் சிறிது நேரம் ஓய்வு எடுக்கிறார். பின்னர், அங்கிருந்து 2 கி.மீ. தொலைவுக்கு சாலையில் மக்களை சந்திக்கிறார். பிறகு பழைய பேருந்து நிலையம் அருகே அமைக்கப்பட்டுள்ள முன்னாள் முதல்வர் கருணாநிதி சிலையைத் திறந்து வைக்கிறார். மீண்டும் இரவு சுற்றுலா மாளிகையில் தங்குகிறார்.