காரைக்கால் அரசு மருத்துவமனையில் 6 மாதங்களாகியும் பயன்பாட்டுக்கு வராத எம்.ஆர்.ஐ. ஸ்கேன்

காரைக்கால் அரசு பொது மருத்துவமனையில் ரூ. 11.50 கோடியில் நிறுவப்பட்ட எம்.ஆர்.ஐ. ஸ்கேன் கருவி, 6 மாதங்களாகியும் பயன்பாட்டுக்கு வராதது பொதுமக்களிடையே அதிருப்தியை ஏற்படுத்தியுள்ளது.

- என்.எஸ். செல்வமுத்துக்குமாரசாமி

காரைக்கால், மே 11: காரைக்கால் அரசு பொது மருத்துவமனையில் ரூ. 11.50 கோடியில் நிறுவப்பட்ட எம்.ஆர்.ஐ. ஸ்கேன் கருவி, 6 மாதங்களாகியும் பயன்பாட்டுக்கு வராதது பொதுமக்களிடையே அதிருப்தியை ஏற்படுத்தியுள்ளது.

காரைக்கால் அரசு பொது மருத்துவமனைக்கு நாள்தோறும் 300 வெளி நோயாளிகள் சிகிச்சை பெற வருகின்றனர். அதோடு விபத்தில் காயம் மற்றும் தீவிர நோய் தொடர்பாக 10-க்கும் மேற்பட்டோர் உள்நோயாளியாக அனுமதிக்கப்படுகின்றனர். இதனால், இம்மருத்துவமனையில் எம்.ஆர்.ஐ. ஸ்கேன் வசதி ஏற்படுத்த வேண்டும் என நீண்ட காலமாக கோரிக்கை விடுக்கப்பட்டு வந்தது. இங்கு சி.டி. ஸ்கேன் மட்டுமே உள்ளதால், எம்.ஆர்.ஐ. ஸ்கேன் பரிசோதனை தேவைப்படுவோர், காரைக்கால் தனியார் மருத்துவக் கல்லூரி மருத்துவமனை மற்றும் வெளியூருக்கு செல்லவேண்டிய நிலை இருந்தது.

இம் மருத்துவமனையில் எம்.ஆர்.ஐ. ஸ்கேன் வசதி ஏற்படுத்த வேண்டும் என காரைக்கால் மாவட்டத்தைச் சேர்ந்த மக்கள் பிரதிநிதிகளும், புதுவை அரசை தொடர்ந்து வலியுறுத்தி வந்தனர்.