மரபணு திருத்தப்பட்ட நெல் ரகங்கள் அறிமுகம்: நாட்டில் முதல்முறை

நாட்டில் முதல்முறையாக மரபணு திருத்தம் செய்யப்பட்ட இரு நெல் ரகங்களை மத்திய வேளாண் துறை அமைச்சர் சிவராஜ் சிங் சௌஹான் தில்லியில் ஞாயிற்றுக்கிழமை அறிமுகப்படுத்தினார்.

- 

புது தில்லி, மே 4: இதன்மூலம் நெல் விளைச்சல் 30 சதவீதம் வரை அதிகரிக்கும் என்றும் அவர் தெரிவித்தார்.

டிஆர்ஆர்தன் 100 (கமலா) மற்றும் 'பூசா டிஎஸ்டி ரைஸ் 1' எனப்பெயரிடப்பட்டுள்ள அந்த நெல் ரகங்கள் இந்திய வேளாண்மை ஆராய்ச்சி கவுன்சில் மூலம் மரபணு ரீதியாக திருத்தம் செய்யப்பட்டதாகும்.

இவை பருவநிலை மாற்றத்தால் ஏற்படும் பாதிப்புகளைத் தாக்குப் பிடித்து வளர்வதுடன் 30 சதவீதம் கூடுதலாக விளைச்சல் தரக்கூடியவையாகும்.

இந்த நெல் ரகங்களை அறிமுகம் செய்து அமைச்சர் சிவராஜ் சிங் சௌஹான் பேசியதாவது: இந்திய வேளாண் துறைக்கு இது மிகவும் முக்கியமான நாள். மரபணு திருத்தம் செய்த இந்த இரு நெல் ரகங்களும் விரைவில் விவசாயிகளுக்கு கிடைக்கும். இவை தண்ணீர் பற்றாக்குறையைத் தாக்குப் பிடித்து வளரும்; 20 முதல் 30 சதவீதம் வரை கூடுதல் விளைச்சல் கிடைக்கும். கரியமில வாயு வெளியேற்றமும் குறைவாக இருக்கும்.