கனடா: மீண்டும் பிரதமராகிறார் மார்க் கார்னி

கனடா நாடாளுமன்றத்துக்கு திங்கள்கிழமை நடந்துமுடிந்த தேர்தலில் ஆளும் லிபரல் கட்சி அதிக இடங்களைக் கைப்பற்றி, அதன் தலைவரும் தற்போதைய பிரதமருமான மார்க் கார்னி அந்தப் பதவியைத் தொடரவிருப்பது உறுதியாகியுள்ளது.

- 

டொரன்டோ, ஏப். 29:

கனடா பொருள்கள் மீது அமெரிக்க அதிபர் டொனால்ட் டிரம்ப்பின் கூடுதல் வரி விதிப்பு, கனடாவை தங்கள் நாட்டுடன் இணைத்துக்கொள்வதாக அவர் மிரட்டல் விடுத்தது போன்ற பரபரப்பான சூழலில் வாக்காளர்கள் பிரதமர் மார்க் கார்னியின் பின் திரண்டதால் இந்த எதிர்பாராத வெற்றி லிபரல் கட்சிக்குக் கைகூடியிருப்பதாகக் கூறப்படுகிறது.

அதே போல், சில வாரங்களுக்கு முன்னர் வரை கருத்துக்கணிப்புகளில் முன்னிலை வகித்துவந்த கன்சர்வேட்டிவ் கட்சி, இந்தத் தேர்தலில் அதிர்ச்சிகர தோல்வியைக் கண்டது. அதன் தலைவரும், நாட்டின் அடுத்த பிரதமராகப் பொறுப்பேற்பார் என்று நம்பப்பட்ட வருமான பியர் பொய்லியேவ்ரே தனது சொந்தத் தொகுதியிலேயே தோல்வியடைந்தார்.