பெங்களூரு உள்கட்டமைப்பு வளர்ச்சிக்கு ரூ. 7,000 கோடி ஒதுக்கீடு

பெங்களூரு உள்கட்டமைப்பு வளர்ச்சிக்கு ரூ. 7,000 கோடி ஒதுக்கீடு செய்யப்படும் என்று கர்நாடக பட்ஜெட்டில் தெரிவிக்கப்பட்டுள்ளது.

- 

பெங்களூரு, மார்ச் 7:

கர்நாடக சட்டப் பேரவையில் சாதனை எண்ணிக்கையாக 16-ஆவது பட்ஜெட்டை வெள்ளிக்கிழமை தாக்கல் செய்து முதல்வர் சித்தராமையா பேசியதாவது:

மாநில பொருளாதாரத்துக்கு முக்கியப் பங்காற்றி வரும் பெங்களூரு மாநகரின் அடிப்படை உள்கட்டமைப்புக்கு அரசு முக்கியத்துவம் அளிக்கிறது. பெங்களூரின் உள்கட்டமைப்பு வளர்ச்சிக்கு வழக்கமாக ரூ.3,000 கோடி நிதி ஒதுக்கப்படும். இப்போது, அந்த நிதியை ரூ.7,000 கோடியாக உயர்த்தி வழங்கப்படும். முன்னுரிமை அடிப்படையில் திட்டங்களைச் செயல்படுத்தவும், மானியத்தை உரிய முறையில் பயன்படுத்திக் கொள்ளவும் சிறப்புப் பயன்பாட்டு திட்டம் வகுக்கப்படும்.

'பிராண்ட் பெங்களூரு பசுமை பெங்களூரு' திட்டத்தின் கீழ் ரூ. 35 கோடி செலவில் 14 ஏரிகள் மேம்படுத்தப்படும். பெங்களூரு வளர்ச்சி ஆணையத்தின் மூலம் வர்த்தூர், பெலந்தூர் ஏரிகளைப் புதுப்பிக்க ரூ. 234 கோடியில் பணிகள் தொடங்கப்படும். அடுத்த 3 ஆண்டுகளில் ஒருங்கிணைந்த சுகாதாரத் திட்டத்தை அமல்படுத்த ரூ. 413 கோடி ஒதுக்கப்படும்.

79.65 கி.மீ. தொலைவுக்கு 68 ரயில் நிலையங்களுடன் மெட்ரோ ரயில் சேவை இயக்கப்படுகிறது. அடுத்த 2 ஆண்டுகளில் இந்த சேவையுடன் மேலும் 98.60 கி.மீ. மெட்ரோ ரயில் தடம் சேர்க்கப்படும். மெட்ரோ ரயில் சேவை தேவனஹள்ளி வரை விரிவாக்கப்படும்.

நீண்ட காலமாக நிலுவையில் இருக்கும் வெளிவட்ட சாலை திட்டத்தை 'பெங்களூரு வர்த்தக வழித்தடம்' என்று பெயர் மாற்றம் செய்து ரூ.27,000 கோடியில் செயல்படுத்தப்படும்.

பெங்களூரில் பருவநிலை மாற்றத்தால் ஏற்படும் வெள்ள பாதிப்புகளைத் தவிர்க்க, முறை சார் புதைசாக்கடை கட்டமைப்பு மற்றும் கழிவுநீர் சுத்திகரிப்பு நிலையங்கள் அமைக்க பெங்களூரு மாநகராட்சி, பெங்களூரு குடிநீர் வடிகால் வாரியத்துக்கு ரூ. 3,000 கோடி ஒதுக்கப்படும்.

ரூ. 40,000 கோடியில் பெங்களூரு மாநகராட்சி மேற்கொண்டிருக்கும் வடக்கு- தெற்கு மற்றும் கிழக்கு- மேற்கு சுரங்கப்பாதை அமைக்க ரூ.19,000 கோடிக்கான வாக்குறுதியை அரசு அளிக்கிறது.