திமுகவின் தொகுதிப் பங்கீட்டுக் கணக்கு!

திமுக கூட்டணியில் தனக்குரிய தொகுதிகளைக் குறைத்துக் கொண்டு, கூட்டணிக் கட்சிகளைத் திருப்திப்படுத்துவதற்கான உத்தியை திமுக வகுத்துள்ளதாக தகவல் வெளியாகியுள்ளது.

- பீ. ஜெபலின் ஜான்

2019 மக்களவைத் தேர்தலில் பெற்ற வெற்றியின் அடிப்படையில், கூட்டணிக் கட்சிகளுக்கு ஒரு மக்களவைக்கு 3 பேரவைத் தொகுதிகளை 2021-இல் திமுக ஒதுக்கியது.

ஆனால், இந்த முறை சில கட்சிகளுக்கு கூடுதல் தொகுதிகள், பெரும்பாலான கட்சிகளுக்கு கடந்த முறையைக் காட்டிலும் குறைவான தொகுதிகளை ஒதுக்க வேண்டிய நிர்ப்பந்தம் திமுகவுக்கு ஏற்பட்டிருக்கிறது.

கடந்த 2019 மக்களவைத் தேர்தலின் போது திமுக தலைமையில் உருவான கூட்டணி அப்படியே தொடர்கிறது. ஆனால், எதிர்வரும் சட்டப்பேரவைத் தேர்தலில் தேமுதிக, மக்கள் நீதி மய்யம், மனிதநேய ஜனநாயக கட்சி (தமிமுன் அன்சாரி), முக்குலத்தோர் புலிப்படை (கருணாஸ்), கொங்கு இளைஞர் முன்னணி (உ.தனியரசு), தமிழர் தேசம் கட்சி (கே.கே.எஸ். செல்வக்குமார்), எஸ்டிபிஐ உள்ளிட்ட கட்சிகள் புதிதாகச் சேர்ந்துள்ளன. இதனால் அணியில் இணைந்துள்ள புதிய வரவுகளுக்கும் தொகுதிகளை ஒதுக்க வேண்டிய கட்டாயம் திமுகவுக்கு ஏற்பட்டிருக்கிறது. அதன்படி, திமுக தனக்குரிய தொகுதிகளைக் குறைத்துக் கொள்வதுடன், ஏற்கெனவே கூட்டணியில் இருக்கும் கட்சிகளின் தொகுதிகளைக் குறைக்கவும் திட்டமிட்டிருப்பதாகத் தெரியவந்துள்ளது.