பாதுகாப்பு காரணங்களுக்காக உளவு மென்பொருள் பயன்பாடு தவறில்லை

'பாதுகாப்புக் காரணங்களுக்காக ஒரு நாடு உளவு மென்பொருளைப் பயன்படுத்துவதில் எந்தவிதத் தவறும் இல்லை; அது யாருக்கு எதிராகப் பயன்படுத்தப்படுகிறது என்பதுதான் கேள்வி என்று உச்சநீதிமன்றம் செவ்வாய்க்கிழமை கூறியது.

- 

புது தில்லி, ஏப். 29:

இஸ்ரேலைச் சேர்ந்த என்எஸ்ஓ நிறுவனத்தின் 'பெகாசஸ் ஸ்பைவேர்' என்ற உளவு மென்பொருள் மூலம், உலகின் பல்வேறு நாடுகள் தங்கள் நாட்டைச் சேர்ந்த அரசியல்வாதிகள், சமூக ஆர்வலர்கள், பத்திரிகையாளர்களின் கைப்பேசிகளை உளவு பார்த்து, வாட்ஸ்ஆப் தகவல்கள் உள்ளிட்ட கைப்பேசி தரவுகளைச் சேகரித்ததாகப் புகார்கள் எழுந்தன.

அதுபோல், இந்தியாவும் இந்த உளவு மென்பொருளைப் பயன்படுத்தி அரசியல்வாதிகள் மற்றும் பத்திரிகையாளர்களின் கைப்பேசிகளை உளவு பார்த்ததாகச் சர்ச்சை எழுந்தது.

இது தொடர்பாக உச்சநீதிமன்றத்தில் வழக்குத் தொடரப்பட்டது. இந்த வழக்கை கடந்த 2021-ஆம் ஆண்டு விசாரித்த உச்சநீதிமன்றம், அனுமதியற்ற வகையில் பெகாசஸ் உளவு மென்பொருள் பயன்பாடு தொடர்பாக ஆய்வு செய்ய உச்சநீதிமன்ற முன்னாள் நீதிபதி ஆர்.வி.ரவீந்திரன் தலைமையில் இணையப் பாதுகாப்பு, எண்மயவியல், இணைய வலைத்தொடர்பு ஆகிய துறைகளைச் சேர்ந்த மூன்று நிபுணர்களை உள்ளடக்கிய தொழில்நுட்பக் குழுவை அமைத்தது.