சிலம்பாட்டம் எனும் வீர விளையாட்டு!

தமிழகத்தில் எத்தனையோ வீர விளையாட்டுகள் இருந்தாலும், சிலம்பாட்டத்துக்குத் தனி மரியாதையும் பெருமையும் உண்டு.

- ஐவி.நாகராஜன்

இப்போதைய காலகட்டம்போல் பழங்காலத்தில் நவீன ஆயுதங்கள் இல்லை. பல ஊர்களுக்கு இடையே காடுகள் இருந்தன. கொடிய விலங்குகளிடம் இருந்து தங்களைத் தற்காத்துக்கொள்ள குறுவாள்கள், கம்பு, கோடரி போன்றவற்றை மக்கள் பயன்படுத்தினார்கள். அதிலும் கம்புகளைத்தான் அதிகம் பயன்படுத்தினார்கள். அந்தக் கம்புகளைச் சுழற்றும் முறையே சிலம்பாட்டம் எனப்படுகிறது. அதனால், சிலம்பாட்டத்தை ஆதிகால விளையாட்டு என்று சொல்லலாம்.

சிலம்பு என்ற சொல்லுக்கு ஒலித்தல் என்று பொருள். ஆயுதங்கள் ஒன்றோடு ஒன்று உரசும்போது, ஒலி கேட்பதால், இந்த விளையாட்டுக்கு சிலம்பாட்டம் என்ற பெயர் வந்ததாம். மலைப்பகுதிகளில் பலவகையான ஒலிகள் கேட்டுக் கொண்டே இருப்பதால், அதற்கு சிலம்பம் என்ற காரணப்பெயர் உண்டு.

ஐவகை நிலங்களில் குறிஞ்சி நிலக்கடவுளான முருகனுக்கு சிலம்பன் என்ற பெயர் உண்டு. அகத்திய முனிவர், ஆய்கலைகள் அறுபத்து நான்கில் சிலம்பாட்டத்தை வகைப்படுத்துகிறார் என்று சொல்லப்படுகிறது. சிலப்பதிகாரத்தில் சிலம்பாட்டம் பற்றிய குறிப்புகள் உண்டு.