பயங்கரவாத ஆதரவு நாடுகள் மீது கடும் நடவடிக்கை

ஜி7 மாநாட்டில் பிரதமர் மோடி வலியுறுத்தல்

- 

கனனாஸ்கிஸ், ஜூன் 18: "பயங்கரவாதத்துக்கு எதிரான உலகளாவிய நடவடிக்கைகளுக்கு ஜி7 நாடுகள் ஊக்கமளிக்க வேண்டும்; பயங்கரவாதத்தை வளர்க்கும்-ஆதரிக்கும் நாடுகள் மீது கடுமையான நடவடிக்கை தேவை" என்று ஜி7 உச்சிமாநாட்டில் பிரதமர் நரேந்திர மோடி வலியுறுத்தினார்.

உலகின் வளர்ந்த பொருளாதார நாடுகளான பிரான்ஸ், பிரிட்டன், ஜெர்மனி, ஜப்பான், இத்தாலி, கனடா மற்றும் ஐரோப்பிய யூனியன் அங்கம் வகிக்கும் ஜி7 கூட்டமைப்பின் உச்சிமாநாடு, கனடாவின் ஆல்பர்ட்டா மாகாணம், கனனாஸ்கிஸ் நகரில் செவ்வாய்க்கிழமை நடைபெற்றது.

கனடா பிரதமர் மார்க் கார்னியின் அழைப்பின்பேரில், இம்மாநாட்டில் சிறப்பு அழைப்பாளராக பிரதமர் மோடி நேரில் பங்கேற்றார். மாநாட்டு அமர்வில் அவர் ஆற்றிய உரை வருமாறு: அண்மையில் கொடூரமான, கோழைத்தனமான தாக்குதலை (பஹல்காம்) இந்தியா எதிர்கொண்டது. இது, இந்தியாவின் ஆன்மா, அடையாளம், நாட்டு மக்கள் ஒவ்வொருவரின் கண்ணியத்தின் மீது நிகழ்த்தப்பட்ட தாக்குதலாகும்.