ஐரோப்பிய நாடுகளுடன் போரிடத் தயார்: புதின்

தேவைப்பட்டால் ஐரோப்பிய நாடுகளுடன் போர் புரியத் தயாராக இருப்பதாக ரஷிய அதிபர் விளாதிமீர் புதின் சூளுரைத்துள்ளார்.

- 

இது குறித்து மாஸ்கோவில் நடைபெற்ற முதலீட்டாளர்கள் கூட்டத்தில் அவர் பேசியதாவது:

உக்ரைன் போரை முடிவுக்குக் கொண்டுவரும் அமெரிக்காவின் அமைதித் திட்டத்தில் ஐரோப்பிய நாடுகள் முற்றிலும் ஏற்கத்தகாத கோரிக்கைகளைச் சேர்த்து மாற்றியுள்ளன. இது, உக்ரைனில் அமைதி ஏற்படுவதற்கான முயற்சியை ஐரோப்பிய நாடுகள் விரும்பவில்லை என்பதைக் காட்டுகிறது.

அந்த நாடுகள் போரைத்தான் விரும்புகின்றன. ஆனால் எங்களுக்கு ஐரோப்பாவுடன் போரிடுவதில் விருப்பமில்லை. ஆனால் அவர்கள் போரைத் தொடங்கினால், அவர்களுடன் போரிட நாங்கள் தயாராகவே இருக்கிறோம் என்றார் அவர்.

இதற்கிடையே, அமெரிக்கா முன்வைத்துள்ள அமைதி திட்டத்தை விளாதிமீர் புதின் நிராகரிக்கவில்லை என்று ரஷிய அதிபர் மாளிகை செய்தித் தொடர்பாளர் டிமித்ரி பெஸ்கோவ் கூறினார்.