அழகான போலி புரோக்கர்களால் இளம்பெண்களை காட்டி பணம் பறிப்பு அரங்கேறும் திருமண மோசடி

லட்சக்கணக்கில் செலவு செய்து ஏமாறும் இளைஞர்கள்

- 

போலி திருமண புரோக்கர்களை நம்பி, இளைஞர்கள் ஏமாந்து வருவது அதிகரித்துள்ளது.

நாகர்கோவில், ஜூலை 7: போலி திருமண புரோக்கர்களை நம்பி, இளைஞர்கள் ஏமாந்து வருவது அதிகரித்து வருகிறது.

மனிதனின் வாழ்வில் மிக முக்கியமானது திருமணம் ஆகும். திருமண பந்தம் என்பது ஒவ்வொருவரின் வாழ்க்கையிலும் உயிருடன் கலந்ததாகும். எங்கோ பிறந்து, எங்கோ வாழ்பவர்கள் திருமண பந்தத்தில் இணைந்து இல்லற வாழ்வில் அடியெடுத்து வைத்து, இணை பிரியா தம்பதிகளாக வாழ்வார்கள். தற்போது சமூக வலை தளங்களின் வளர்ச்சி காரணமாக மணமகன், மணமகள் தேடும் படலம் என்பது இன்ஸ்டாகிராம், பேஸ்புக் தளங்களுக்குள் வந்து விட்டது. அந்த காலத்தில் திருமணத்துக்காக மணமகள், மணமகன் தேடும் புரோக்கர்கள் இருந்தனர். உறவுகள் மூலமும், பல்வேறு விழாக்களில் சங்கமித்தும் திருமண முடிச்சுகளை போட்டனர்.

இன்றும் பலர், திருமண பந்தங்களை தரகர்கள் (புரோக்கர்கள் என்றும் அழைக்கப்படுவார்கள்) தான் இணைக்கிறார்கள். இவ்வாறு தரகர்கள் மூலம் இணைந்த பல திருமண பந்தங்கள், ஆயிரங்காலத்து பயிராக நிலைத்து நிற்கின்றன. ஆனால் ஒரு சிலர் இளைஞர்களை நம்பி திருமண புரோக்கர்கள் என்ற போர்வையில் இளம் பெண்களை வைத்து பணம் சம்பாதிக்க தொடங்கி விடுகின்றனர்.