கீழடி தமிழர் நாகரிகத்தை புறந்தள்ளும் பாஜ அரசு

தமிழர்களின் வாழ்வியல், பழக்க வழக்கங்கள், வசிப்பிடம், வணிகம், அன்பு, கொடை, வீரம், காதல், திருமணம், இறப்பு - இப்படி எத்தனையோ தகவல்களை இலக்கியங்களில் படித்து மெய்சிலிர்த்திருப்போம். ஆனால், அதற்கான சான்றுகள் பூமிக்கடியில் புதைந்து கிடக்கும் அதிசயங்களை கீழடியில் கண்டோம்.

- 

தமிழர்களின் நாகரிக வாழ்வு, சுமார் 2,500 ஆண்டுகளுக்கு முற்பட்டது என அகழாய்வுச் செய்தியை கேட்டதும், செவிகளை இறுக்க மூடிக் கொண்டது ஒன்றிய பாஜ அரசு. ஆதி தமிழன் அழகிய வாழ்வியலோடு கட்டிடங்கள் கட்டி வாழ்ந்தான். தனியறைக்குள் கழிப்பறை வசதிகளோடு கூட வாழ்ந்திருக்கிறான் என்ற கீழடியில் தோண்ட, தோண்ட கிடைத்த அடையாளங்கள், உலகத்தையே உலுக்கி போட்டது.

ஆனால், அதற்கான அறிவியல்பூர்வமான ஆய்வறிக்கை கொண்டு வா... காலத்தை நிர்ணயித்தது எப்படி என்பது உட்பட பல விளக்கங்களை கேட்டு, கீழடியில் கிடைத்த தமிழர்களின் வாழ்வியல் காலத்தை, இருட்டடிப்பு செய்வதற்கான நடவடிக்கையில் இறங்கியுள்ளது ஒன்றிய அரசு. இதற்கு தமிழக முதல்வர் மு.க.ஸ்டாலின் மற்றும் எதிர்க்கட்சி தலைவர்கள், தொல்லியல் அறிஞர்கள், தமிழக மக்கள் கடும் கண்டனங்களை பதிவு செய்துள்ளனர்.

அமர்நாத் ஆய்வு அறிக்கையும்... அசைக்க முடியாத ஆதாரமும்...

அமர்நாத் ராமகிருஷ்ணா அறிக்கையில் உள்ள சில முக்கிய அம்சங்களை பார்ப்போம்:

கீழடி கிமு ஐந்தாம் நூற்றாண்டிலிருந்து கிமு முதலாம் நூற்றாண்டின் முடிவு வரை, ஒரு முதிர்ந்த வாழ்விட பகுதியாக இருந்திருக்க வேண்டும். இங்கு பெரிய மற்றும் சிறிய அளவிலான செங்கல் கட்டுமானங்கள் கண்டறியப்பட்டுள்ளன. இந்த காலகட்டத்தில் கீழடி நகரப் பண்புகளைக் கொண்ட மிக முக்கியமான இடமாக இருந்திருக்க வேண்டும்.

கீழடியின் மூன்றாவது காலகட்டம் கி.மு. ஒன்றாம் நூற்றாண்டின் முடிவிலிருந்து கி.பி. மூன்றாம் நூற்றாண்டையும் தாண்டிச் செல்கிறது. இந்த இரு அகழாய்விலும் இங்கு கிடைத்த காசுகள், அதற்கு முன்பாக இங்கு கிடைத்த காசுகள் ஆகியவற்றை வைத்துப் பார்க்கும்போது, இந்த மூன்றாவது காலகட்டம் பத்தாம் நூற்றாண்டு வரை நீண்டிருக்கலாம் எனக் கருதப்படுகிறது. ஆகவே, கீழடியின் காலகட்டம் என்பது கிமு எட்டாம் நூற்றாண்டில் துவங்கி கிபி பத்தாம் நூற்றாண்டுவரை நீண்டிருக்கிறது.

குழி தோண்டியது ஒன்றிய அரசு குன்றின் மீது ஏற்றினார் முதல்வர்