கொளத்தூர் சட்டமன்ற தொகுதியில் பொங்கல் விழா 200 தொகுதிகளுக்கு மேல் வெற்றி உறுதி

தமிழ்நாடு முதலமைச்சர் மு.க.ஸ்டாலின் நேற்று (10.1.2026) சென்னை, கொளத்தூர் தொகுதியில் அடங்கிய பெரம்பூர், டான்பாஸ்கோ பள்ளி வளாகத்தில் நடைபெற்ற பொங்கல் விழாவில் கலந்து கொண்டு, ஆற்றிய உரை.

- முதல் அமைச்சர் மு.க. ஸ்டாலின் பேச்சு

தமிழர் திருநாளாம் பொங்கல் திருநாளை எழுச்சியோடு கொண்டாடும் இந்த சிறப்பான நேரத்தில் உங்களை எல்லாம் நான் சந்தித்து, இந்த கொளத்தூர் தொகுதியில் - மன்னிக்கவும் - நம்முடைய கொளத்தூர் தொகுதியில் இருக்கக்கூடிய கழகத்தின் செயல்வீரர்களுக்கு பொங்கல் வாழ்த்துகளை தெரிவிக்கும் ஒரு நல்ல வாய்ப்பு எனக்கு முன்கூட்டியே கிடைத்திருக்கிறது.

இந்த சிறப்பான நிகழ்ச்சியை அது எந்த நிகழ்ச்சியாக இருந்தாலும் கிழக்கு மாவட்டத்தின் செயலாளராக நம்முடைய சேகர்பாபு அவர்கள் இருந்தாலும், நம்முடைய தொகுதி என்று சொன்னால் அதில் ஒரு எழுச்சி இருக்கும். ஒரு சிறப்பு இருக்கும், ஒரு மகிழ்ச்சி இருக்கும், ஒரு ஆர்வம் இருக்கும், ஆரவாரம் இருக்கும். நம்மையே அறியாமல் நம்முடைய உள்ளத்தில் ஒரு புளங்காகிதம் இருக்கும். அந்த உணர்வோடு இந்த நிகழ்ச்சியை ஏற்பாடு செய்திருக்கும் நம்முடைய சேகர்பாபு அவர்களுக்கும் அவருக்கு துணை நின்ற கழக நிருவாகிகளுக்கும் நான் முதலில் என்னுடைய நன்றியை தெரிவித்துக்கொள்ள விரும்புகிறேன்.