వరద సమయంలో బురద రాజకీయాలు వద్దు..

• నష్ట పోయిన ప్రతి ఒక్కరికి నష్ట పరిహారం అందిస్తాం : సీఎం రేవంత్ • ఎకరాకు రూ.10వేలు నష్టపరిహారం, మృతులకు 5లక్షలు ఎక్స్ గ్రేషియా

• పశువులు చనిపోతే 50వేలు, జీవాలకు 5వేల చొప్పున అందజేస్తం

• కేంద్ర ప్రభుత్వాన్ని ఐదువేల కోట్లు తక్షణ సాయం అందించాలని కోరాం

• సూర్యాపేట జిల్లా సమీక్ష సమావేశంలో సీఎం రేవంత్ రెడ్డి వెల్లడి

• వరద బాధితులకు తక్షణ సహాయం ప్రకటన

• వరద ప్రభావిత ప్రాంతాల్లో సీఎం రేవంత్ పర్యటన

• సూర్యాపేట, ఖమ్మం జిల్లాల్లో కలియ తిరిగిన ముఖ్యమంత్రి

• సీఎం వెంట మంత్రులు ఉత్తమ్, కోమటిరెడ్డి, తుమ్మల, పొంగులేటి

• హైదరాబాద్ నుంచి రోడ్డు మార్గంలో ఖమ్మం వెళ్లిన రేవంత్ రెడ్డి

సూర్యాపేట ప్రతినిధి 02 సెప్టెంబర్ (ఆదాబ్ హైదారాబాద్) : భారీ వర్షాలు, వరదల కారణంగా నష్టపోయిన పంటలకు ఎకరాకు రూ. 10 వేల చొప్పున పరిహారం అందిస్తామని సీఎం రేవంత్ రెడ్డి చెప్పారు. సోమవారం సూర్యాపేట, ఖమ్మం జిల్లాల్లో ముఖ్యమంత్రి పర్యటించారు. హైదరాబాద్ నుంచి రోడ్డు మార్గం ద్వారా నల్గొండ, సూర్యాపేట, ఖమ్మం జిల్లాల మీదుగా వెళ్తూ పరిశీలించారు.

సూర్యాపేట జిల్లా మోతెలో మంత్రులు ఉత్తమ్ కుమార్ రెడ్డి, కోమటిరెడ్డి వెంకట్ రెడ్డి, ఎమ్మెల్యేలతో కలిసి సీఎం సమీక్ష నిర్వహించారు. ఈ సందర్భంగా ఆయన మాట్లాడుతూ.. వరద బాధిత రైతులను ఆదుకుంటామని భరోసా ఇచ్చారు. గత నెల 30, 31,ఈ నెల 1న అకాల వర్షాల కారణంగా సూర్యాపేట జిల్లాలో 30 సెంటీమీటర్ల పైగా వర్షం కురిసి పెద్ద ఎత్తున పంట, ఆస్తి నష్టం, ప్రాణ నష్టం జరిగాయని, ఇది బాధాకరమని అన్నారు. వర్షాల కారణంగా చనిపోయిన వారి కుటుంబాలకు 5 లక్షల రూపాయల ఎక్స్ గ్రేషియాను ఇచ్చేందుకు ప్రభుత్వం నిర్ణయం తీసుకున్నట్లు తెలిపారు.