വിവേചനങ്ങൾക്കെതിരെ പോരാടിയ ശ്രീകുമാര ഗുരുദേവൻ

നവോത്ഥാന നായകർ 

അധഃസ്ഥിത സമുദായത്തിൽ ജനനം. അയിത്താചാരങ്ങളുടെ നുകത്തിൽ ആണ്ടിറങ്ങിയപ്പോൾ മോചനം തേടി മതപരിവർത്തനം. അവിടെയും സ്ഥാനം മതാന്ധതയുടെ പുറമ്പോക്കിൽ. ഒടുവിൽ മതങ്ങൾ തെളിച്ച പാതകൾ മറികടന്ന് ദ്രാവിഡദളിതൻ എന്ന ആശയം ഉയർത്തിപ്പിടിച്ച സാമൂഹികവിപ്ലവകാരി. ശ്രീകുമാര ഗുരുദേവൻ എന്ന പൊയ്കയിൽ യോഹന്നാന്റെ ജീവിതം ഇങ്ങനെ:

തിരുവല്ലയ്ക്കടുത്ത ഇരവിപേരൂരിൽ 1878 ഫെബ്രുവരി 17-ന് ജനനം. ശങ്കരമംഗലം ക്രൈസ്തവ തറവാട്ടിലെ പറയ സമുദായത്തിൽപ്പെട്ട അടിയാൻ കുടുംബത്തിലെ അംഗമായിരുന്നു. പിതാവ് പൊയ്കയിൽ കണ്ടൻ, മാതാവ് ളേച്ചി. കുമാരൻ എന്ന് ആദ്യകാല നാമം. കന്നുകാലിനോട്ടവും കൃഷി പണിയുമായിരുന്നു കുട്ടിക്കാലത്തെ ജോലി. അടിയാന്മാർക്ക് അക്ഷരാഭ്യാസം നിഷിദ്ധമായിരുന്നതിനാൽ കൊച്ചുകുഞ്ഞ് ഉപദേശിയാണ് അക്ഷരവിദ്യപകർന്നുനൽകിയത്.

കുമാരൻ ബാലനായിരിക്കെ തന്നെ കുടുംബം ക്രിസ്തുമതം സ്വീകരിച്ച് മാർത്തോമാസഭയിൽ ചേർന്നു. പേര് യോഹന്നാൻ എന്നായി. പ്രസംഗപാടവവും യുക്തിബോധവും നേതൃശേഷിയും കൊണ്ട് വിദേശ മിഷണറിമാരുടെ പോലും പ്രശംസ ഏറ്റുവാങ്ങി. പൊയ്കയിൽ യോഹന്നാൻ ഉപദേശി എന്ന പേരിൽ പ്രസിദ്ധനുമായി. എന്നാൽ, ക്രിസ്തുമതത്തിൽ ചേർന്നിട്ടും അധഃസ്ഥിതർക്ക് അനുഭവിക്കേണ്ടിവന്ന വിവേചനങ്ങൾ അദ്ദേഹത്തിന്റെ പ്രതീക്ഷകൾക്ക് മങ്ങലേൽപ്പിച്ചു. അവശ ക്രിസ്ത്യാനികൾ എന്ന് പേര് ചാർത്തപ്പെടുക മാത്രമല്ല അവർക്ക് പ്രത്യേക പള്ളികളിൽ ആരാധന നടത്തേണ്ടതായും വന്നു. സവർണ പള്ളികളിൽ പ്രവേശനം നിഷിദ്ധമാക്കപ്പെട്ടു.