અશક્ત શરીર, પણ સશક્ત મનથી અસહ્ય બીમારીને આાપી માત

એનો જન્મ જાહોજલાલીમાં થયો. લગ્ન પણ સાધન-સંપન્ન પરિવારમાં થયાં. સુખ-વૈભવથી છલોછલ આ મહિલાને કોઈ વાતની કમી નહોતી, પરંતુ અચાનક એક જટિલ બીમારીએ એના શરીર પર કબજો કર્યો. શરૂઆતની હતાશા ખંખેરી એણે કોઈ વિચારી પણ ન શકે એવા ફિટનેસ ક્ષેત્રમાં પ્રવેશ કર્યો. માંદગી, નાણાકીય સંકટ અને કુટુંબની જવાબદારી વચ્ચે અમદાવાદની આ ગૃહિણીએ અસાધારણ હિંમત અને મક્કમતા દાખવી. પોતાની સાહસિકતા સાબિત કરવા સાથે જ જીવનમાં હાર માની ચૂકેલી અનેક મહિલાઓને એ મક્કમ મનોબળથી કોઈ પણ મુશ્કેલી પર જીત મેળવતાં શીખવે છે.

- હેતલ રાવ

એ આખી રાત નેહા રડતી રહી. સાંજે જ ડૉક્ટરે એને સ્પષ્ટ કહ્યું હતું: ‘તારી આ બીમારી તો દૂર થાય એમ નથી.

એક્સરસાઈઝ કરીશ તો થોડો ફેર પડી શકે...' નેહાના કાનમાં આ શબ્દો હજી પડઘાતા હતા. આંખ સામે નાના દીકરાને જોઈ એ વિચાર કરી રહી હતી કે હું આને કેવી રીતે મોટો કરીશ? હવે મારું શું થશે? શું મારે આખું જીવન આ જ પીડા સાથે વ્યતીત કરવું પડશે?

આવા અનેક સવાલોના જવાબમાં નેહાના મને એને કહ્યું: ‘તારી પાસે બે રસ્તા છે. એક, તું થાકી-હારીને ખૂણામાં બેસી જા... અને બીજો રસ્તો એ કે હિંમત કર, ઊભી થા અને તારી બીમારીને કહી દે કે તાકાત હોય તો તને હરાવીને બતાવે!’

નેહાએ બીજો રસ્તો પસંદ કર્યો. શરૂઆતમાં ઘરે જ કસરત કરવાનું શરૂ કર્યું. પહેલાં તો એને ખૂબ તકલીફ પડતી, પણ અડગ મન સાથે નેહા આગળ વધતી રહી. એને કસરત કરતી જોઈને આસપાસની અનેક મહિલા પણ એની સાથે કસરતમાં જોડાવા લાગી. પછી તો પોતાનું જ બેઝમેન્ટ સાફ કરીને ત્યાં ખાસ એક્સરસાઈઝ માટે જગ્યા બનાવવામાં આવી. ધીમે ધીમે નેહામાં શક્તિ આવવા લાગી.

બીમારી હતી, પણ એ નેહા પર છવાઈ ન શકી. પોતાના દઢ મનોબળથી નેહાએ જાણે બીમારીને એના શરીરમાં આગળ વધતી અટકાવી દીધી. પછી તો કોઈ વિચારી પણ ન શકે એવા ક્ષેત્રમાં નેહાએ ઝંપલાવ્યું. એણે અશક્ત શરીર સાથે સશક્ત કામ શરૂ કર્યું અને ફિટનેસ સ્ટુડિયો શરૂ કર્યો. હા, એ પોતે આર્થરાઈટિસ જેવી વ્યાધિથી પીડાય છે. આ બીમારીને કારણે એના શરીરના અનેક સાંધામાં સોજા આવી જાય અને એટલા ભાગમાં સખત પીડા થાય. આર્થરાઈટિસ વ્યક્તિની રોજિંદી દિનચર્યાને પ્રભાવિત કરે છે અને એનાથી પીડાતા ઘણા લોકોને ક્યારેક નાનાઅમથા કામ માટે પણ બીજાની મદદની જરૂર પડે છે.

આવી પીડા વિસારે પાડી નેહાએ પોતે પોતાનું સ્વાસ્થ્ય સુધારવાનું નક્કી કર્યું અને પોતાની જેવા બીજા લોકોની દુર્દશા જોઈ એમને પણ મદદ કરવાનું ઠેરવ્યું. આજે અમદાવાદમાં એના બે ફિટનેસ સ્ટુડિયો ચાલે છે, જ્યાં એ ફિટનેસ અને ડાયેટ કન્સલ્ટિંગ માટે માર્ગદર્શન આપે છે. સાથે જ ખાસ તો અનેક મહિલાઓને પોતાનાં શરીર અને મન સાથે લડવા માટેની પ્રેરણા પણ પૂરી પાડે છે. વચ્ચેનાં વર્ષોમાં જીવનમાં બીજા પણ અનેક ચઢાવ-ઉતાર આવ્યા, પણ એ બધી કસોટીમાંથી સાંગોપાંગ બહાર આવી નેહાબહેને આજે પોતાનું એક સ્થાન બનાવ્યું છે.