એની રંગોળીના રંગ એટલે જાણે સેવાની સરવાણી

રંગોળી માત્ર દિવાળીના દિવસોમાં જ હોય એવું જરૂરી નથી. કોઈ પણ પ્રસંગે રંગોળી બનાવી આ કળાને કારકિર્દીમાં પલટી નાખી અને સાથોસાથ એ દરમિયાન જ ગરીબોને નિયમિત મદદરૂપ થવાનું વિચારનારા યુવાનો ઘણા ઓછા હોય છે. જો કે રંગોળીકળામાં નિપુણ એક રાજકોટવાસી યુવતીએ પોતાની કમાણીમાંથી જરૂરતમંદ લોકોને સહાય કરીને યુવાપેઢીને નવો રાહ ચીંધ્યો છે.

- દેવેન્દ્ર જાની

દિવાળી કે લગ્નપ્રસંગોએ રંગોળીમાં નિપુણ કલાકારો ઘરના આંગણામાં પોતાની કળાનો કસબ પ્રદર્શિત કરવા થનગનતા હોય છે. આવડત મુજબ રંગોળી બનાવીને ઉત્સવને રંગીન બનાવતા શોખીન જીવડા પોતાની આ કલરફુલ કળાક્ષમતાને કરિયર બનાવવાનું ભાગ્યે જ વિચારતા હશે, પણ રાજકોટની એક યુવતીએ પોતાના આ શોખને પ્રોફેશનલ ટચ આપ્યો. એટલું જ નહીં, આ ઉંમરે જરૂરતમંદ લોકોને મદદ કરવા પોતાની કમાણીમાંથી શક્ય એટલી ૨કમ સેવાકાર્યમાં વાપરીને યુવાપેઢીને અનોખી પ્રેરણા આપી છે.

એનું નામ કિંજલ ભરતસિંહ રાજપૂત. રાજકોટવાસી કિંજલના પરિવારમાં કોઈને પેન્ટિંગ કે આર્ટ સાથે લગાવ નહીં, પરંતુ કિંજલને નાનપણથી જ આધ્યાત્મિકતા તરફ ઝુકાવ હોવાથી એ ધાર્મિક ઉત્સવો-કાર્યક્રમોમાં અચૂક જાય. એમાંથી એને જુદાં જુદાં રંગો-ફૂલોથી રંગોળી બનાવવાનો શોખ જાગ્યો. શરૂઆતમાં ઘર કે પરિવારના પ્રસંગે કે દિવાળી જેવા તહેવારે એ આંગણે રંગોળી બનાવે. કિંજલની આંગળીઓમાં એવી તો કળા વસી છે કે જોનારા એની રંગોળી નીરખીને દંગ રહી જાય. ધીરે ધીરે રંગોળી આર્ટમાં માસ્ટરી આવતાં એનો આત્મવિશ્વાસ વધી ગયો અને મંદિરમાં કે ધાર્મિક સ્થળે ઉત્સવોમાં એણે રંગોળી-પોર્ટ્રેટ બનાવવાનું શરૂ કર્યું.