એક અનોખો શિક્ષણયજ્ઞ ગુજરાતી દ્વારા.. ગુજરાતીમાં.. ગુજરાતી માટે!

નવા જમાનાને અનુરૂપ શિક્ષણ ગુજરાતીમાં પણ મળી રહે એ માટે હાર્દિક દેસાઈએ શરૂ કરી છે વેબસાઈટ.

- 

ઈન્ટરનેટ પર અભ્યાસલક્ષી સાહિત્ય માટે ખાંખાંખોળા કરો તો અંગ્રેજીમાં ઘણું ઉપલબ્ધ છે, પણ ગુજરાતીમાં આંગળીને વેઢે ગણી શકાય. જો કે એક સુરતી યુવાનના પ્રયાસોથી હવે ગુજરાતીમાં પણ વિપુલ માત્રામાં અભ્યાસલક્ષી સાહિત્ય વિનામૂલ્યે પ્રાપ્ત થઈ રહ્યું છે.

ગુવાહાટીથી સ્નાતક થયેલા અને છેલ્લાં સાત વર્ષથી અનેક શૈક્ષણિક સંસ્થા અને પ્રવૃત્તિ સાથે જોડાયેલા melzo.com વેબસાઈટના સ્થાપક હાર્દિક દેસાઈ ચિત્રલેખાને કહે છેઃ

‘ગુજરાતી માધ્યમના વિદ્યાર્થીઓને એક વિકલ્પ આપવા અમે melzo.com વેબસાઈટ શરૂ કરી છે, જેનું બેઝિક વર્ઝન નિઃશુલ્ક ઉપલબ્ધ છે. આ વેબસાઈટ થકી વિદ્યાર્થીઓ AR (Augmented reality), VR (Virtual Reality), Al (Artificial intelligence) જેવા વિષયનું અત્યાધુનિક ટેક્નોલૉજીસભર શિક્ષણ મેળવી શકશે. ગુજરાત બોર્ડના ગુજરાતી માધ્યમના અભ્યાસક્રમને અનુલક્ષીને વેબસાઈટ તૈયાર કરી છે, જેમાં બાર ધોરણ સુધીના વાણિજ્ય અને વિજ્ઞાન પ્રવાહનો આખો અભ્યાસક્રમ સમાવિષ્ટ છે. હાલમાં સંસ્કૃત તથા ધોરણ ૧૧-૧૨ આર્ટ્સના અભ્યાસક્રમ ડેવલપ થઈ રહ્યા છે.’