આંબાડાળે હીંચકો રે કંઇ ભૂલે ઝૂલે ઊંચે આભ સૈંયર.....

આપણે પ્રયત્નપૂર્વક જે ગામડાંઓ ભાંગી નાંખ્યા છે તે હવે પછીનાં પચાસ વરસેય ફરી વસાવવાં પડશે, કા૨ણ કે શહેરોમાં તો મોંઘેરા મોતનું ડિસ્કાઉન્ટ સેલ ચાલુ થવાનું છે.

- દિલીપ ભટ્ટ

આ વખતે ઉનાળાએ ડામ દીધા એટલે માંચ ઊડી ગયો, પણ મૂળભૂત ગ્રીષ્મ હજુ ઢળતા ઢાળે હોવા છતાં ગઈ નથી. હજુય દૂર-દૂર આમ્રકુંજોમાં કોયલના ટહુકારથી બપોર હિલ્લોળા લઈ રહી છે. સીમ ચાલુ થાય કે તરત કોયલનો સાદ સંભળાય. જે બોલે છે તે નકોકિલ હોય છે. કોકિલા એટલે કે કોયલ તો ચૂપ જ રહે છે ને એના આયુષ્યકાળમાં ભાગ્યે જ બોલે છે. કોકિલ અને કોકિલાનું દામ્પત્ય માનવજાતના નરને ઈર્ષ્યા આવે એવું છે. સહધર્મચારિણી માત્ર શ્રોતા હોય તો એના જેવી ધન્યતા બીજી શું હોય? મોટા ભાગના કિસ્સાઓમાં ગૃહસ્થ શ્રોતા હોય છે અને ગૃહિણી અખંડ વક્તા હોય છે! ગીરકાંઠાનાં ગામડાંઓમાં પણ આ વખતે આંબા ૫૨ લીલી ચટ્ટાક કેરીઓના ફાલ આવ્યા હતા.