નોન-ઇમિગ્રન્ટ વિઝાની બારીઓ

અમેરિકા જોડે બિઝનેસ કરવા માટે, અમેરિકામાં ભરાતાં પ્રદર્શનો, એક્સ્પો તેમ જ સેમિનારોમાં પરદેશી બિઝનેસમેનોની હાજરી અનિવાર્ય હોય છે

- ડો.સુધીર શાહ

અમેરિકા ઇમિગ્રન્ટોનો દેશ છે. એ અત્યંત વિશાળ છે, પણ એની વસતિ એના કદ પ્રમાણે ઓછી છે. આ ઉપરાંત અમેરિકા અત્યંત ધનિક દેશ પણ છે. ત્યાંની જમીનમાં તેલના ભંડારો ભર્યા છે. અફાટ ખનિજો છે. ખેતીવાડી માટે ત્યાં પુષ્કળ જમીનો છે. છેલ્લાં થોડાં વર્ષોથી કમ્પ્યુટરનો ઉદ્યોગ પણ અમેરિકામાં ખૂબ જ ફૂલ્યોફાલ્યો છે. આજે અમેરિકાની ગણના વિશ્વના સૌથી આગળ પડતા દેશોમાં થાય છે અને એ પ્રથમ શ્રેણીમાં ટકી રહેવા માટે અમેરિકાને દરેક ક્ષેત્રના, નાનાથી મોટા કાર્યકરોની જરૂરિયાત રહે છે. આથી જ એના ‘ધ ઇમિગ્રેશન ઍન્ડ નેશનાલિટી ઍક્ટ’માં ઍમ્પ્લૉયમૅન્ટ બેઝ્ડ ચાર જુદી-જુદી પ્રેફરન્સ કૅટેગરી ઘડવામાં આવી છે, જેના દ્વારા અમેરિકન માલિકોને જુદાં-જુદાં કાર્યો કરવા માટે, જે-તે કાર્યના નિષ્ણાત કાર્યકરોને એ ચારમાંની જે અનુરૂપ હોય એ કૅટેગરી હેઠળ એમના લાભ માટે ગ્રીનકાર્ડની પિટિશન દાખલ કરવાની સવલત આપે છે. આ ઉપરાંત જેમને ગ્રેજ્યુએટ થયેલા, ભણેલા-ગણેલા કાર્યકરોની તુરંત જ જરૂરિયાત હોય એમના માટે સ્પેશિયાલિટી ઓક્યુપેશન વર્કરો માટેના ‘એચ-૧બી’ વિઝા ઘડ્યા છે. આમ અમેરિકાએ એમના દેશમાં, એમની જરૂરિયાતને પહોંચી વળવા જુદા-જુદા પ્રકારના ઇમિગ્રન્ટ તેમ જ નોન-ઇમિગ્રન્ટ વિઝા ઘડ્યા છે.