પાવર ઓફ સ્ટોરી: ‘દૃશ્યમ'ની કોરિયન ભાષામાં (પણ) રિમેક

મોહનલાલ અભિનીત અને જીતુ જોસેફ લિખિત તથા દિગ્દર્શિત ‘દૃશ્યમ’ ફિલ્મની કોરિયન ભાષામાં રિમૅક બનશે. ‘દૃશ્યમ'ની જુદી-જુદી ભાષામાં આ ૮મી સત્તાવાર રિમૅક છે! ચાઇનીઝ સુદ્ધાંમાં ‘દૃશ્યમ’ બની ચૂકી છે. બૉલિવૂડમાં દમદાર વાર્તાનો દુકાળ છે, એવામાં આ ઑરિજિનલ દક્ષિણ ભારતીય ફિલ્મ પાસેથી સમજવા જેવું છે કે, વાર્તામાં દમ હશે તો આખી દુનિયા તેને સ્વીકારશે..

સિનેમા ઓડિયો-વિઝ્યુઅલનું માધ્યમ છે, દ્રશ્ય-શ્રાવ્યનું. તેમાં કલ્પનાના રંગોને ટેક્નોલોજીનો ઉપયોગ કરીને અભિવ્યક્ત કરવામાં આવે છે. અત્યારે કેમેરા, ટેક્નિશિયન્સથી શરૂ કરીને વીએએક્સ સુધીનાં પાસાં આલા દરજ્જાનાં છે. અગાઉ કરતાં તમામ મોરચે સો ગણું આગળ અને અધતન છે, પણ વાર્તાઓ ખૂટી પડી છે! બોલિવૂડની ફિલ્મો અચાનક પટકાવવા માંડી અને દક્ષિણ ભારતની ફિલ્મો ‘ઊડવા’ માંડી, તેનું કારણ આ જ છેઃ વાર્તાઓ! ટેક્નોલોજી તો અહીં પણ દમદાર છે. સક્ષમ અભિનેતાઓ પણ હિન્દી સિનેમા પાસે છે, પણ મૌલિક વાર્તાનો દુકાળ પડ્યો.

છેલ્લા અરસામાં જે હિન્દી ફિલ્મો ધમધોકાર ચાલી તેનું તારણ કાઢીએ તો ખ્યાલ આવે છે કે તેમાંથી મોટા ભાગની દક્ષિણ ભારત કે અન્ય ફિલ્મોની સત્તાવાર કે બિનસત્તાવાર રિમેક હતી! કોરોના બાદ વિશ્વ વધુ નાનું બન્યું, લોકો દરેક પ્રકારનું અને દરેક ભાષાનું કન્ટેન્ટ જોતાં થયા. એટલે આ રિમેક ફિલ્મોને મળતો રિસ્પોન્સ ઘટવા માંડ્યો.