പോകുമ്പോൾ മുതൽ തിരിച്ചുവരുന്നതുവരെ പ്രവാസികൾക്കായി 3 ഫിനാൻഷ്യൽ പ്ലാനുകൾ

വളരെ നല്ല ജോലിയും വരുമാനവും ഉള്ളവർപോലും പ്രവാസം മതിയാക്കി തിരിച്ചുവരുമ്പോൾ വല്ലാത്ത സാമ്പത്തിക പ്രതിസന്ധിയിൽ അകപ്പെട്ടു നട്ടംതിരിയാറുണ്ട്. എന്നാൽ ശരിയായ ഒരു ഫിനാൻഷ്യൽ പ്ലാനിങ് ഉണ്ടെങ്കിൽ ഈ പ്രതിസന്ധി ഒഴിവാക്കാൻ നിങ്ങൾക്കു കഴിയും. വിവിധ പ്രായക്കാർക്കു വേണ്ടിയുള്ള 3 മാതൃകാ പ്ലാനുകൾ കാണുക.

- ഉത്തര രാമകൃഷ്ണൻ

25-30 വയസ്സുകാർക്ക്

വിദേശത്തെത്തി ജോലിയിൽ പ്രവേശിച്ചാൽ ഒട്ടും വൈകാതെതന്നെ സാമ്പത്തികാസൂത്രണം ആരം ഭിക്കണം. ചെലവുകൾക്ക് ആവശ്യാനുസരണം പണത്തിനു ലിക്വിഡിറ്റിയുള്ള പദ്ധതി, യാത്ര/അവധി ദിവസങ്ങൾപോലുള്ള ഹ്രസ്വകാല ആവശ്യങ്ങൾ, ദീർഘകാല സമ്പാദ്യം എന്നിവയിൽ കേന്ദ്രീകരിച്ചുവേണം ഇത്തരം പ്ലാനിങ് നടത്താൻ. ഒപ്പം ഘട്ടംഘട്ടമായി എമർജൻസി ഫണ്ട് സ്വരൂപിക്കുന്നതിനും മുൻഗണന നൽകണം.

താമസിക്കുന്ന രാജ്യത്തെ കറൻസിയിൽ 2 മാസത്തെ ചെലവിനുള്ള തുക നീക്കിവയ്ക്കാം. 4 മാസത്തെ ചെലവുകൾക്കുള്ള തുക എൻആർഇ ഫിക്സഡ് ഡിപ്പോസിറ്റായി സൂക്ഷിക്കുക. ഇതിലെ നിക്ഷേപം നികുതിരഹിതമാണ്, ലിക്വിഡിറ്റിയും ഉണ്ട്. ഇന്ത്യയിലേക്കുള്ള യാത്രകൾക്കും മറ്റ് ഉല്ലാസ യാത്രകൾക്കു മായി എൻആർഇ സേവിങ്സ് അക്കൗണ്ടിൽനിന്ന് റിക്കറിങ് ഡിപ്പോസിറ്റ് നടത്തുന്നത് ഉചിതമായിരിക്കും.

ദീർഘകാല സമ്പത്തു സൃഷ്ടിക്കാൻ ഇക്വിറ്റി മ്യൂച്വൽ ഫണ്ടുകളിൽ എസ്ഐപി ആരംഭിക്കണം. സാധ്യമെങ്കിൽ വരുമാനത്തിന്റെ 20% എങ്കിലും ഈ രീതിയിൽ നിക്ഷേപിക്കണം. അതിനു കഴിയില്ലെങ്കിൽ കുറഞ്ഞത് 10% എങ്കിലും നിക്ഷേപിക്കാൻ ശ്രമിക്കുക. ബാക്കിതുക മതി ചെലവുകൾക്ക് എന്നു നിശ്ചയിച്ച് അതനുസരിച്ചു ജീവിക്കുക.

ദീർഘകാല ആവശ്യങ്ങൾ പലതുണ്ടാകും. ഓരോ ലക്ഷ്യത്തിനുവേണ്ടി തുക വിഭജിച്ചു നിക്ഷേപിക്കാം. റിട്ടയർമെന്റിന് ഉറപ്പായും ഒരു തുക നീക്കിവയ്ക്കണം. കുട്ടികളുണ്ടെങ്കിൽ, അല്ലെങ്കിൽ ഉണ്ടായശേഷം അവരുടെ ഉന്നത വിദ്യാഭ്യാസത്തിനും ഒരു വിഹിതം നിക്ഷേപിക്കാം.