ഷെയർ മാർക്കറ്റിൽ അഞ്ചര പതിറ്റാണ്ടിന്റെ ഇന്നിങ്സ് 'ഓഹരി തന്നത് നേട്ടങ്ങൾ മാത്രം'

കേരളത്തിൽ നിന്നും ഓഹരിവിപണിയിൽ പ്രവേശിച്ച സീനിയർ മോസ്റ്റ് തലമുറയുടെ പ്രതിനിധി കെ.എഫ്. ഫ്രാൻസിസ് അനുഭവങ്ങൾ പങ്കുവയ്ക്കുന്നു

- സനിൽ എബ്രഹാം

ഓഹരിവിപണിയിലെ നിക്ഷേപം എന്ന ത്രില്ലർ സിനിമയിൽ അഞ്ചര പതിറ്റാണ്ടായി അടിപതറാതെ മീശ പിരിച്ചു നിൽക്കുന്ന നായകനാണ് കൊച്ചി കളത്തിപ്പറമ്പിൽ ഫ്രാൻസിസ് മകൻ ഫ്രാൻസിസ് എന്ന കെ.എഫ്. ഫ്രാൻസിസ്.

ട്വിസ്റ്റുകൾ നിറഞ്ഞ ത്രില്ലർ സിനിമ പോലെയാണ് ഓഹരിവിപണി. കാണിയുടെയും നിക്ഷേപകന്റെയും പ്രതീക്ഷയ്ക്കു വിരുദ്ധമായി പല കാര്യങ്ങളും ഇത്തരം സിനിമകളിലെന്ന പോലെ വിപണിയിലും സംഭവിക്കുന്നു.

പക്ഷേ, ചിലരുണ്ട്. അവരുടെ കണക്കുകൂട്ടലുകൾ പോലെ തന്നെ കാര്യങ്ങൾ നടക്കും. അങ്ങനെ നടക്കുന്നത് തങ്ങളുടെ മിടുക്കു കൊണ്ടല്ല, മറിച്ച് ചില ആദർശങ്ങൾ അഥവാ തത്വങ്ങൾ കൃത്യമായി പാലിക്കപ്പെടുന്നതു കൊണ്ടാണെന്ന് ഇവർ പറയും.

കേരളത്തിൽ നിന്നും ഓഹരിവിപണിയിൽ പ്രവേശിച്ച സീനിയർ മോസ്റ്റ് തലമുറയുടെ പ്രതിനിധിയാണിദ്ദേഹം.

വല്യപ്പൻ ചീക്കു കളത്തിപ്പറമ്പിൽ ജയിൽ സൂപ്രണ്ടായിരുന്നു. കൊച്ചി നഗരത്തിലെമ്പാടും സ്ഥലങ്ങളുണ്ടായിരുന്നതുകൊണ്ട് വിറ്റുവരവും ലാഭവും ചെറുപ്രായത്തിൽ തന്നെ ഫ്രാൻസിസിന്റെ തലയിലും കയറി.

അങ്ങനെയാണ് 1970കളിൽ കൂട്ടുകാരനായ മാത്യുവിന്റെ കൂടെ മട്ടാഞ്ചേരിയിൽ പോയിത്തുടങ്ങിയത്. ഇപ്പോഴും കൊച്ചിയിൽ തന്നെ ഉള്ള മാത്യുവാണ് വിപണിയിലെ ഗുരുനാഥൻ.