ടാക്സ് റിട്ടേൺ സന്തോഷത്തിന്റെ കണക്കു പുസ്തകമാക്കാം

ഐടിആറിനെ സന്തോഷത്തിന്റെ കണക്കു പുസ്തകമാക്കാം. അതൊരിക്കലും പ്രാരബ്ധത്തിന്റെ മാറാപ്പല്ല.

- കെ. കെ. ജയകുമാർ

ഇൻകം ടാക്സ് റിട്ടേൺ ഫയൽ ചെയ്യാൻ എനിക്ക് എവിടെയാ സമയം, ഒരാളെ ഏൽപിച്ചു. സംസാരം കേട്ട് ഞാൻ തല ഉയർത്തി നോക്കി. വൈകിട്ടത്തെ ഗുരുവായൂർ ഇന്റർസിറ്റിയാണ് രംഗം. ശമ്പളവരുമാനക്കാർ നിറഞ്ഞ കംപാർട്മെന്റിൽ നാൽപതിനോട് അടുത്തു പ്രായമുള്ള രണ്ടുപേർ സംസാരിക്കുകയാണ്.

ഇൻകംടാക്സും ടിഡിഎസുമായി പൈസ സർക്കാർ കൊണ്ടുപോകും. അതിന്റെ കൂടെ കുറച്ചു പൈസ മുടക്കി റിട്ടേൺ ഫയൽ ചെയ്യിച്ചു. എന്തിനാ വെറുതെ ഇതിന്റെയൊക്കെ പിറകേ പോകുന്നത്? അതു ശരിയാ. ഓഫിസിലെ ക്ലാർക്കിന്റെ കയ്യും കാലും പിടിച്ചാണ് ഞാൻ ഫയൽ ചെയ്തത്. എങ്ങനാ, ഇത്തവണ റീഫണ്ട് വല്ലതും ഉണ്ടോ? അറിയില്ല, പുള്ളിയെ വിളിക്കാൻ കഴിഞ്ഞില്ല.