മെഡിറ്ററേനിയൻ മാസ്റ്റർപീസ്

കാക്കനാടിനടുത്ത് പള്ളിക്കരയിലെ 2800 ചതുരശ്രയടിയുള്ള ഈ വീട് എൽവിസിന്റെയും ഡിങ്കിളിന്റെയും സ്വപ്നസാക്ഷാത്കാരമാണ്

- 

നഗരത്തിന്റെ സൗകര്യങ്ങളാണോ ഗ്രാമത്തിന്റെ സ്വച്ഛതയാണോ നല്ലത് എന്നതിൽ ഓരോരുത്തർക്കും വ്യത്യസ്ത അഭിപ്രായങ്ങളായിരിക്കും. എന്നാൽ ശാന്തസുന്ദരമായ ഒരു സ്ഥലം നഗരസൗകര്യങ്ങൾക്കൊപ്പം കിട്ടിയാൽ ആരും സന്തോഷിക്കും. തിരക്കും മാലിന്യവും അന്തരീക്ഷമലിനീകരണവുമൊക്കെ കൊണ്ട് കാക്കനാട്ടെ ജീവിതം അസഹ്യമായപ്പോഴാണ് കുറച്ച് ഉള്ളിലേക്കു നീങ്ങി ഒരു പ്ലോട്ട് വാങ്ങാമെന്ന് എൽവിസ് ലോറൻസും ഡിങ്കിളും തീരുമാനിച്ചത്. ഗ്രാമീണത വിട്ടുമാറാത്ത പള്ളിക്കരയിലെ 20 സെന്റ് കണ്ടപ്പോൾ വിട്ടുകളാൻ തോന്നിയില്ലെന്ന് എൽവിസ് പറയുന്നു. സ്വപ്നം കണ്ടതൊക്കെ യാഥാർഥ്യമാക്കാനുള്ള രണ്ടര കൊല്ലം നീണ്ട യത്നത്തിനു തുടക്കമായിരുന്നു അത്.

“ നാല് സെന്റിലായിരുന്നു ഞങ്ങളുടെ ആദ്യത്തെ വീട്. സ്വകാര്യത കുറവായിരുന്നു എന്നതും നഗരത്തിരക്കുമാണ് പുതിയ സ്ഥലം അന്വേഷിക്കാൻ കാരണം. ഈ പ്ലോട്ടിലേക്ക് പ്രധാനമായി ആകർഷിച്ചത് ഇവിടത്തെ ശാന്തതയാണ്. റബർ തോട്ടമാണ് ചുറ്റും. ഇപ്പോൾ അതെല്ലാം പ്ലോട്ടുകൾ ആയി മാറിയെങ്കിലും നഗരത്തിരക്ക് തൽക്കാലം പേടിക്കേണ്ട.