സംഗീത നിറവിലെ ഓണവിഭവങ്ങൾ...

ഓണക്കാലമെന്നത്, സ്നേഹത്തിന്റെ, കരുതലിന്റെ ഒത്തുചേരലിന്റെ വേറിട്ട നിമിഷങ്ങൾ കൂടിയാണ്. ലോകത്തിന്റെ ഏത് കോണിലായാലും, ചിങ്ങമാസമെത്തി, പൂവിളികൾ ഉയരുമ്പോൾ, നാട്ടിലേക്ക് ഓടിയെത്തി പ്രിയപെട്ടവർക്കൊപ്പം കുറച്ചുനേരമെങ്കിലും ചെലവഴിക്കാൻ കൊതിക്കാത്തവരുണ്ടാകില്ല... നാടുവിട്ട് പ്രവാസികളായി കഴിയുന്ന ഞങ്ങളുടെയെല്ലാം ഉളളിൽ ഓണമെന്നത് പറഞ്ഞറിയിക്കാനാകാത്ത അനുഭവമായി മാറുന്നതും അതുകൊണ്ടുതന്നെയാണ്.

- പ്രദീപ് ഉഷസ്സ്

പ്രശസ്ത ഗായികയും, സംഗീതാദ്ധ്യാപികയുമായ ദിവ്യാവിമൽ “മഹിളാരത്ന'ത്തോട് മനസ്സ് തുറക്കുകയായിരുന്നു. ഏറെക്കാലമായി അബുദാബിയിൽ ശാസ്ത്രീയ സംഗീതപഠനകേന്ദ്രം നടത്തുന്ന ദിവ്യയും കുടുംബവുമാണ് ഇക്കുറി മഹിളാരത്നം' വായനക്കാർക്കായി ഓണവിഭവങ്ങൾ ഒരുക്കുന്നത്. അബുദാബിയിൽ ആവലോൺ ടെക്നോളജി സൊലൂഷനിലെ അക്കൗണ്ട്സ് മാനേജർ ആയ ഭർത്താവ് വിമലും, പെരുമ്പാവൂരിലെ വേങ്ങൂർ കല്ലേലിൽ വീട്ടിൽ ദിവ്യക്കൊപ്പമുണ്ട്. മക്കൾ പ്രാർത്ഥനയും പുണ്യയും പൂക്കളമൊരുക്കുന്ന തിരക്കിലാണ്. പേരക്കുട്ടികൾക്കൊപ്പം ചേർന്ന് സന്തോഷം പങ്കുവയ്ക്കുകയാണ് ബാലകൃഷ്ണൻ നായരും, ബേബിയും ശശിധരൻനായരും വിജയലക്ഷ്മിയുമെല്ലാം.. അവർ പാടിക്കൊടുക്കുന്ന പൂപ്പാട്ടുകളും കഥകളുമെല്ലാം സ്നേഹപൂർവ്വം നെഞ്ചേറ്റുകയാണ് പ്രാർത്ഥനയും പുണ്യയും. അവർക്കൊപ്പം പൂവിളികളുമായി ദിവ്യയും വിമലു മെല്ലാം ചേർന്നതോടെ, അവിടം ഓണനിറവിന്റെ മാസ്മരികാനുഭൂതിയായി മാറുകയായിരുന്നു.

വേറിട്ട സംഗീതയാത്രയായിരുന്നു ദിവ്യയുടേത്... ചന്ദ്രമന നാരായണൻ നമ്പൂതിരിയുടെ അടുക്കൽ നിന്നായിരുന്നു പഠനം. കുട്ടിക്കാലത്തു തന്നെ നന്നായി പാടിയിരുന്ന ദിവ്യ അതിനോടൊപ്പം മിമിക്രിയും ചെയ്തിരുന്നു. കെ.ബി. സുന്ദരാംബാൾ തൊട്ട്, പി. ലീലയേയും, എസ്. ജാനകിയേയും പോലെയുള്ള പ്രശസ്ത സംഗീതജ്ഞരുടെ ശബ്ദവും പാട്ടുമെല്ലാം ഈ കൊച്ചുപാവാടക്കാരി അനുകരിക്കുന്നത് ഏറെ ശ്രദ്ധിക്കപ്പെടുകയും ചെയ്തു. ഇതിനിടയിലാണ് ഗാനഗന്ധർവ്വൻ യേശുദാസിനെ പരിചയപ്പെടാൻ ദിവ്യയ്ക്ക് അവസരമുണ്ടായത്. ആ കൂടിക്കാഴ്ചയാണ് തന്റെ ജീവിതത്തിലെ ഏറ്റവും വലിയ വഴിത്തിരിവായതെന്ന് ദിവ്യ പറയുന്നത് ഹൃദയം നിറഞ്ഞ് തന്നെയാണ്.