സൈബർ ഇടങ്ങളിലെ സിനിമാനിരൂപണം

 ഇന്ത്യൻ ഭരണഘടനയിലെ ആർട്ടിക്കിൾ 19 ആണ് ഏതൊരു പൗരനും അഭിപ്രായസ്വാതന്ത്ര്യം കൽപ്പിച്ചുനൽകുന്നത്.

- അനീഷ് മോഹനചന്ദ്രൻ

വാളെടുത്തവരെല്ലാം വെളിച്ചപ്പാടാകുന്ന സൈബർ യുഗത്തിൽ സിനിമാനിരൂപണം ഒരു പ്രഹേളിക ആവുകയാണ്. ഈ സമകാലിക യാഥാർത്ഥ്യം ഉൾക്കൊണ്ടുതന്നെ ഒരു സത്യാവസ്ഥ പറയട്ടെ. ആധുനിക സാങ്കേതികതത്വങ്ങളുടെ സാധ്യതകൾ ഉപയോഗിച്ചുകൊണ്ട് ചിലർ സിനിമാ നിരൂപണങ്ങൾ പടച്ചുവിടുന്നത് പലപ്പോഴും തെറ്റായ സന്ദേശമാണ് പ്രേക്ഷകർക്ക് നൽകുന്നത്. അടുത്തിടെ നടന്ന ഒരു സംഭവം ഉദാഹരിക്കാം. ഏറെ ഘോഷിക്കപ്പെട്ട ഒരു ചിത്രത്തിന്റെ റിലീസ് ഡേറ്റ്. ആദ്യഷോ കഴിയും മുന്നേ തന്നെ നിർമ്മാതാവിന് തന്റെ സുഹൃത്തിന്റെ ഒരു കോൾ വന്നു. ചിത്രം വിചാരിച്ചത് പോയില്ല അല്ലേ...? സുഹൃ ത്തിന്റെ ചോദ്യം കേട്ട് നിർമ്മാതാവ് ആദ്യമൊന്ന് ഞെട്ടി. കാരണം ആദ്യഷോ പോലും കഴിഞ്ഞിട്ടില്ല. അതിനുമുന്നേ തന്നെ പടം പൊളിഞ്ഞോ ഇല്ലയോ എന്ന് എങ്ങനെ വിലയിരുത്താനാകും. ഇക്കാര്യം നിർമ്മാതാവ് തന്നെ ഫോണിൽ ബന്ധപ്പെട്ട സുഹൃത്തിനോട് പറഞ്ഞപ്പോൾ അദ്ദേഹവും ഒന്നമ്പരന്നു. തുടർന്ന് താൻ ഫേസ്ബുക്കിലെ നെഗറ്റീവ് കമന്റ്സും റിവ്യൂവും കണ്ടിട്ടാണ് വിളിച്ചതെന്ന് അറിയിച്ചു. ഇതോടെ നിർമ്മതാവും അമ്പരപ്പിലായി.