സന്തോഷമേ ഉള്ളൂ ജാഫർ ഇടുക്കി

ജാഫർ ഇടുക്കിയോ... അതാരാ ? എന്ന് ചോദിച്ച തലമുറയെക്കൊണ്ടു തന്നെ ജാഫർ ഇടുക്കി പൊളിയല്ലേ എന്ന് പറയിപ്പിച്ച നടൻ, മഹേഷിന്റെ പ്രതികാരത്തിൽ സന്തോഷമേ ഉള്ളു എന്ന് നെഞ്ചത്ത് കൈവെച്ച് പറയുന്ന ഒറ്റ ഡയലോഗിലൂടെ തന്നെ മലയാളികളുടെ പ്രിയ നടനായി മാറി. ലിജോ ജോസ് പല്ലിശ്ശേരി എന്ന സംവിധായകൻ ജാഫർ ഇടുക്കി എന്ന നടനെ ഒരു പടികൂടി ഉയർത്തി. ഇഷ്ക്ക്, നായാട്ട്,ജല്ലിക്കെട്ട്, ചുരുളി, അജഗജാന്തരം എന്നീ ചിത്രങ്ങൾ ജാഫർ ഇടുക്കി എന്ന നടന്റെ പ്രതിഭയുടെ മാറ്റുരക്കുന്നവ കൂടി ആയിരുന്നു. നയൻതാരയ്ക്കൊപ്പം 02 എന്ന ചിത്രത്തിലൂടെ തമിഴിലും അരങ്ങേറ്റം കുറിച്ചിരിക്കുകയാണ് ജാഫർ. ജാഫർ ഇടുക്കിയുടെ കൂടുതൽ വിശേഷങ്ങളിലേയ്ക്ക്.

- പി.ജി.എസ്. സൂരജ്

ജാഫർ ഇടുക്കി എന്ന നടന്റെ തലവര മാറ്റിയ സിനിമ

മഹേഷിന്റെ പ്രതികാരം ചെയ്യുമ്പോൾ ദിലീഷ് പോത്തനും ശ്യാം പുഷ്കരനുമാണ് എനിക്ക് ആത്മവിശ്വാസം നൽകിയത്. മഹേഷിന്റെ പ്രതികാരവും ചിത്രത്തിലെ എന്റെ കഥാപാത്രവും ജനങ്ങൾ ഏറ്റെടുത്തു. തുടർന്ന് വലിയ പ്രതീക്ഷകളുമായി രണ്ടുമൂന്നു സിനിമയുടെ ചർച്ചകളൊക്കെയായി ഇരിക്കുന്ന സമയത്താണ് ജീവിതത്തെ ആകെ മാറ്റിമറിച്ച കലാഭവൻ മണിയുടെ മരണം സംഭവിക്കുന്നത്. അന്ന് കേസും കാര്യങ്ങളുമൊക്കെയായി ഏകദേശം ഒന്നേ മുക്കാൽ കൊല്ലം വെറുതെ ഇരിക്കേണ്ടി വന്നു. പിന്നിടാണ് നാദിർഷയുടെ കട്ടപ്പനയിലെ ഋത്വിക് റോഷൻ വരുന്നത്. അതായിരുന്നു എന്റെ തിരിച്ചുവരവ്. അന്നു മുതൽ ഇന്നുവരെ സിനിമകളില്ലാതെ ഇരുന്നിട്ടേയില്ല.

പെപ്പെ , ചെമ്പൻ വിനോദ്, ജാഫർ ഇടുക്കി കൂട്ടുകെട്ടിനെക്കുറിച്ച്

എനിക്ക് വലിയ ഇഷ്ടമുള്ള നടന്മാർ അവരെല്ലാവരും. ആന്റണി പെപ്പ്, ചെമ്പൻ വിനോദ്, ജോജു ആ തുടങ്ങിയവർക്കൊപ്പം കുറേ സിനിമകൾ ചെയ്തിട്ടുണ്ട്. ആന്റണി പെപ്പെയ്ക്കൊപ്പം കോവിഡ് കാലത്ത് ആരവം എന്ന് പേരുള്ള ഒരു സിനിമ ചെയ്തിരുന്നു. പക്ഷേ ആ സിനിമ പൂർത്തിയായില്ല. ജോജുവിനൊപ്പമാണ് കൂടുതൽ സിനിമകൾ ചെയ്തിട്ടുള്ളത്.

ലിജോ ജോസ് പല്ലിശ്ശേരിയുടെ സിനിമകളിലൂടെ ആണല്ലോ താങ്കൾക്ക് മികച്ച വേഷങ്ങൾ കിട്ടിയത്?

ഒരു സിനിമ തുടങ്ങിയാൽ അത് തീരുന്നത് വരെ ലിജോ ജോസ്പെല്ലിശ്ശേരി സീരിയസ്സായിരിക്കും. ലിജോയ്ക്ക് ഷൂട്ടിംഗിനിടയിൽ ബ്രേക്ക് പറയാനൊക്കെ ഭയങ്കര മടിയാണ്. ബ്രേക്ക് ഫാസ്റ്റിനും ലഞ്ചിനുമൊക്കെ എടുക്കുന്ന  ബ്രേക്ക്ടൈം കൂടി ഒഴിവായാൽ അത്രയും സന്തോഷം എന്നുപറയുന്ന വ്യക്തിയാണ് അദ്ദേഹം. നമുക്ക് ചുറ്റും നമ്മൾ നിത്യവും കണ്ട് പരിചയിച്ച സാഹചര്യങ്ങളിൽ നിന്നായിരിക്കും ലിജോ കഥ പറയുന്നത്.

ആദ്യ ചിത്രങ്ങളിലൊന്നായ കയ്യൊപ്പിനെക്കുറിച്ച്