இப்படியொரு உலகப் பயணம் இப்படித்தான் சாத்தியமானது..!

“என் பாஸ்போர்ட்டில் ஒரு முத்திரை கூட இல்லாமல் காலாவதியாகிவிடக்கூடாது என்பதற்காகவே தாய்லாந்து பயணத்தில் சேர்ந்தேன்...” என்று டாக்டர் ஹிதேஷ் கிண்டலாகச் சொல்கிறார்.

- த.சக்திவேல்

ஆனால், உண்மையில் அவர் மீண்டும், மீண்டும் பயணம் செய்யவே விரும்புகிறார்.

முப்பது வயதான ஹிதேஷ், மைசூரைச் சேர்ந்தவர். யோகா மற்றும் தடுப்பு மருத்துவத்தில் முதுகலைப் பட்டம் பெற்றவர். இப்போது ஓர் ஆயுர்வேத மருத்துவக் கல்லூரியில் மருத்துவ ஆலோசகராகவும், உதவிப் பேராசிரியராகவும் பணியாற்றுகிறார்.

அவருக்குக் கண்பார்வை குறைபாடு உள்ளது. இருபது வயதின் பிற்பகுதியில் பார்வையை இழந்ததால், இரவு நேரங்களில் அவரால் எதையும் பார்க்க முடியாது.

"எனக்கு எப்போதுமே பயணம் செய்வது பிடிக்கும். நண்பர்களுடன் சேர்ந்து நானே கார் ஓட்டிச் செல்வேன். ஒவ்வொரு வருடமும் சுற்றுலா செல்ல திட்டமிடுவேன்...' என்கிற ஹிதேஷின் பார்வை மங்கத் தொடங்கியதும், பயணம் செய்வது சிக்கலானது.

நண்பர்கள் ஆதரவாக இருந்தபோதிலும், அவருடைய உண்மையான தேவைகளை அவர்களால் நிறைவேற்ற முடியவில்லை.

உதாரணத்துக்கு, ஒரு நிலப்பரப்பை விவரிப்பது, படிக்கட்டு வரும்போது எச்சரிப்பது அல்லது கூட்டமான தெருவில் சைகை காட்டுவது போன்றவை.

காலப்போக்கில் பயணங்களிலிருந்து ஒதுங்கினார், ஹிதேஷ். ஒரு நாள் 'ரைசிங் ஸ்டார் கிள்தே செஹ்ரே' என்ற அமைப்பு ஏற்பாடு செய்த தாய்லாந்து பயணம் குறித்த வாட்ஸ் அப் செய்தி அவருக்கு வந்தது.

ஒரு நிமிடம் தயங்கியவர், பிறகு அதில் இணைந்தார். அங்கு அவருக்குக் கிடைத்தது வெறும் உதவி மட்டுமல்ல, பயணத்துக்கான புதிய பாதை; ஒரு மாற்றத்திற்கான தொடக்கம்.

சுமார் முப்பதாண்டுகளாக சுற்று லாத்துறையே தனது வாழ்க்கை என இயங்கி வருபவர், அமித் ஜெயின். தில்லியைச் சேர்ந்த அமித்துக்கு சர்வதேச பயணத் திட்டங்கள் மற்றும் விருந்தோம்பல்தான் முக்கிய தொழில்.

2019ம் வருடம் தனது மகளுடன் சென்ற ஒரு பயணத்தின்போது, சில பார்வையற்ற நபர்களைச் சந்தித்துப் பேசினார் அமித். இது அவரது வாழ்க்கையில் மட்டுமல்ல, ஆயிரக்கணக்கான பார்வையற்றவர்களின் வாழ்க்கையிலும் திருப்புமுனை.

ஆம்; அந்த பார்வையற்றவர்கள் அமித்திடம் தாங்களும் உலகைச் சுற்றிப் பார்க்க விரும்புவதாகவும், ஆனால், சமூகம் உண்டாக்கி வைத்திருக்கும் தடைகளால் தாங்கள் முடக்கப்பட்டிருப்பதாகவும் சொல்லியிருக்கின்றனர்.