இது தமிழ்நாட்டின் இந்திய சாதனை!

மனிதர்கள் இல்லை... வெளிச்சம் இல்லை... லட்சக்கணக்கில் தயாராகும் சர்வதேசப் பொருள்...

- டி.ரஞ்சித்

‘சன் பிக்சர்ஸ்’ தயாரிப்பில் இந்தியாவையே அதிர வைத்த ‘எந்திரன்’ படத்தில் சிட்டி எனும் கதாபாத்திரத்தில் ரஜினி ரோபோவாக நடித்திருப்பார் இல்லையா..?

ஒருவேளை அந்த ரோபோ கேரக்டரில் ரஜினி இல்லாமல் ரோபோவே நடித்திருந்தால் எப்படி இருந்திருக்கும்?

சுவாரசியமாக, சவாலாக இருந்திருக்கும் அல்லவா... அந்த சுவாரசியம், சவாலை காஞ்சிபுரத்தில் இருக்கும் ஒரு தொழிற்சாலை சாதித்து வருகிறது என்றால் சும்மாவா!

அதுவும் உழைப்பாளர்களே இல்லாமல் ரோபோவால் இயக்கப்படுகிறது என்றால் ஆச்சரியம்தானே!

இத்தோடு இருட்டில் அந்த ஆலை 24 மணிநேரமும் வேலை செய்கிறது என்றால் மூக்கில் விரலை வைக்கத்தானே தோன்றும்!

காஞ்சிபுரம் ஒரகடத்தில் தமிழ் நாட்டின் சிறப்பு பொருளாதார மண்டலம் செயல்படுகிறது. இங்கே இருக்கும் பல தொழிற்சாலைகள் தமிழக அரசின் சிறப்பு சலுகையில் இயங்குகின்றன.

இங்கு உருவாகும், தயாராகும் எல்லா பொருட்களுமே ஏற்றுமதியை குறிக்கோளாகக் கொண்டவை.

அப்படி இயங்கும் ஆலைகளில் ஒன்றுதான் 'பாலிமாடெக்' (Polymatech) என்ற நிறுவனம். இந்த நிறுவனம் செமி கண்டக்டர்கள் எனச் சொல்லப்படும் சிப்களை தயாரிக்கும் நிறுவனம்.

இந்த நிறுவனத்தின் பெருமை என்னவென்றால் இந்தியாவிலேயே சிப் தயாரிக்கும் உள்ளூரின் ஒரே நிறுவனம் இது மட்டும்தான் என்பதுதான் ஹைலைட்.

சிப் தயாரிக்கும் மற்ற நிறுவனங்கள் பாதுகாப்பு பொருட்டு சிப்களை தயாரிக்கும் அரசு நிறுவனங்களே.

இச்சூழலில் பாலிமாடெக் தனியார் நிறுவனம் என்பதும் கூடுதல் பெருமைதான் தமிழ்நாட்டுக்கு. அதுவும் ஆளே இல்லாமல் தானியங்கியாக ரோபோக்களின் துணையோடு இருட்டில் இயங்குகிறது என்பதுதான் இந்த நிறுவனம் தமிழ் நாட்டுக்கு கொடுத்த மிகப் பெரிய பரிசு, பெருமை எல்லாம்.

இந்த ஆலையை நிறுவியவர் கோவையைச் சேர்ந்த ஈஸ்வர ராவ் நந்தம். பிட்ஸ் பிலானியில் எலக்ட்ரானிக்ஸ் எஞ்சினியரிங், கலிபோர்னியா பல்கலைக் கழகத்தில் பிஎச்.டி படித்த ஈஸ்வர ராவ், இந்த நிறுவனத்தை 2016ம் ஆண்டில் ஜப்பானிடமிருந்து விலைக்கு வாங்கினார்.

ஆலையின் தற்போதைய இயக்குனரான ஈஸ்வர ராவின் மகன் விஷால் நந்தமை ஒரு காலைப் பொழுதில் சந்தித்தோம்.