సంప్రదాయాల సంక్రాంతి

పండుగలన్నిటిలోకి పెద్ద పండుగగా సంక్రాంతిని జరుపుకోవడం అనాదిగా వస్తున్న మన హైందవ సంప్రదాయం. ధనుర్మాసం ప్రారంభం అయినప్పటినుండి- అంటే నెలరోజుల ముందునుండీ తెలుగువారి లోగిళ్లలో సంక్రాంతి సంబరం మొదలవుతుంది. తూరుపు తెలతెలవారక ముందే ముంగిళ్లలో ముగ్గులు అందంగా వేసి, గొబ్బిళ్లను పసుపు కుంకుమలతో అలంకరించి వాటిల్లో పెట్టడంతో రోజు ప్రారంభమౌతుంది.

సంక్రాంతి ముఖ్యంగా మూడురోజుల పండుగ. మొదటిరోజు భోగి నాడు ఉదయాన్నే భోగి మంటలు వేసి పిల్లలు, పెద్దలు అందరూ చుట్టూ చేరతారు. సాయంత్రం ఇంట్లో ఉన్న చిన్న పిల్లలకు భోగిపళ్లు పోస్తారు. రేగుపళ్లు, చెరకు ముక్కలు, బంతి పూల రేకలు, చిల్లర నాణాలు, అక్షింతలు అన్నిటినీ కలిపి పిల్లలకు దిష్టి తీసి, తల మీద పోస్తారు. సంక్రాంతి నాడు బంధుమిత్రులతో కలసి విందుభోజనాలు ఆరగి స్తారు. కనుమ పండుగ అయిన మూడవ రోజు పశువులను అలంకరించి పూజి స్తారు. మహిళలు ఇళ్లల్లో బొమ్మల కొలువులు ఉంచి, మూడు రోజులు పేరంటాళ్లను పిలిచి హారతులిస్తారు.