സംഗീതം കടൽ കാറ്റുപോലെ

ഇന്ത്യ ബുക്ക് ഓഫ് റെക്കോർഡ്സിൽ ഇടംനേടിയ സംഗീതപ്രതിഭയാണു മുഹമ്മദ് യാസിൻ വളർച്ചയില്ലാത്ത കൈകൾ കീ ബോർഡിനെ തലോടുമ്പോൾ അനുഗ്രഹത്തിന്റെ മാന്ത്രികസ്പർശം...

- ബൈജു ഗോവിന്ദ്

തിരയൊടുങ്ങാത്ത കടലിനപ്പുറം കരകളുണ്ടെന്നു മുഹമ്മദ് യാസിനറിയാം. അങ്ങ കലെ ആകാശത്തുകൂടി പറക്കുന്ന വിമാനങ്ങളെ അവൻ നോക്കിയിരിക്കാറുണ്ട്. ചില സമയങ്ങളിൽ അവിടെയൊക്കെ ഓടിയെത്തണമെന്നു തോന്നും. പക്ഷേ, ഏറെ ദൂരം നടക്കാനോ കാണുന്നതെല്ലാം എത്തിപ്പിടിക്കാനോ അവനു കഴിയില്ല.

പിടയുന്ന പിഞ്ചുമനസ്സിന്റെ നൊമ്പരം തിരിച്ചറിഞ്ഞതു കൊണ്ടാവാം അവന്റെ കുഞ്ഞു കൈകളിൽ സംഗീതത്തിന്റെ തലോടലുണ്ടായി. ഹൃദയസ്പർശിയായ ഗാനത്തിന്റെ ഈണം പോലെ പതിമൂന്നുകാരനു മുന്നിലേക്കു പ്രശസ്തിയും പുരസ്കാരങ്ങളും വന്നു ചേർന്നു.

യാസിൻ സംഗീതം പരിശീലിച്ചിട്ടില്ല. ഡാൻസ് പ്രാക്ടീസ് ചെയ്തിട്ടില്ല. സംഗീതോപകരണത്തിൽ ഗുരുക്കന്മാരുമില്ല. ചലിപ്പിക്കാൻ അവനു കൈവിരലുകളുമില്ല. വളർച്ചയെത്തിയ കാലുകളില്ലാത്തതിനാൽ നടക്കാനുമാവില്ല. ഇല്ലാത്ത വിരൽത്തുമ്പു കൊണ്ടു കീബോർഡ് വായിക്കുന്നതു കേൾക്കാനും അവൻ നൃത്തം ചെയ്യുന്നതു കാണാനും ആളുകളും മാധ്യമങ്ങളുമെത്തുന്നതു ദൃക്സാക്ഷ്യം.

കാലം ഒന്നിനും കണക്കു ബോധിപ്പിക്കാതെ കടന്നു പോകില്ലെന്നു പറയുന്നതു വെറുതെയല്ല. ദിവ്യാംഗങ്ങളോടെ പിറന്ന മുഹമ്മദ് യാസിന്റെ പ്രതിഭാശേഷി ഇന്ത്യ ബുക്ക് ഓഫ് റെക്കോർഡ്സിൽ ഇടം പിടിച്ചു. കണ്ണുകെട്ടി കീബോർഡ് വായിച്ച യാസിനെ നോക്കി അവാർഡ് നിർണയ സമിതി അദ്ഭുതം പ്രകടിപ്പിച്ചു. കേരള സർക്കാരിന്റെ ഉജ്വലബാല്യ പുരസ്കാരം, സാമൂഹിക നീതി വകുപ്പിന്റെ പ്രത്യേക പുരസ്കാരം, ഫീനിക്സ് അവാർഡ്, എപിജെ അ ബ്ദുൾ കലാം ബാലപ്രതിഭ, ടിവി പ്രോഗ്രാമിൽ ഷൈ നിങ് സ്റ്റാർ വിന്നർ, ദേശീയ ശിശുസംരക്ഷണ വകു പ്പിന്റെ ബാലപ്രതിഭ പുരസ്കാരം എന്നിങ്ങനെ നിരവധി അംഗീകാരങ്ങൾ വന്നു ചേർന്നു.

യാസിൻ പിറന്ന നിമിഷം മുതൽ ഇന്നുവരെ അവന്റെ കുറവുകളെയോർത്തു സങ്കടപ്പെടാതെ, അവന്റെ കഴിവുകൾക്കൊപ്പം നടക്കുന്ന ഷാനവാസും ഷൈലയും ഹൃദയഭാഷയിൽ വർത്തമാനം പറഞ്ഞു ശീലിച്ചവരാണ്. “ഇടയ്ക്കു ഞാനുമായി വഴക്കിടും. കൂടുതൽ നേരം മൊബൈൽ ഫോൺ നോക്കരുതെന്നു പറയുമ്പോഴാണു പിണക്കം. അവന്റെ ഏത് ഇഷ്ടത്തിനും ഇക്ക എതിരു പറയാറില്ല''ഉമ്മറത്തെ കസേരയിലിരുന്ന് ഷൈല മകനെ ചേർത്തു പിടിച്ചു.

അനുജൻ അൽ അമീനാണു വീടിനുള്ളിൽ യാസിന്റെ കൂട്ടുകാരൻ. സ്കൂളിൽ പോയാൽ സായന്താണ് ബെസ്റ്റ് ഫ്രണ്ട്. സായന്തിന്റെ ചുമലിൽ കയറിയാണു ബാത്റൂമിൽ പോകാറുള്ളത്. ഭക്ഷണം കഴിക്കാൻ പോകുമ്പോഴും യാസിനെ ചുമക്കുന്നതു സായന്താണ്. ഒന്നാം ക്ലാസിൽ തുടങ്ങിയതാണ് ഈ ചങ്ങാത്തം.