തീയണയ്ക്കാൻ ഇനി പെൺപട

പ്രൗഢമായൊരു ചരിത്രം കുറിക്കൽ. 80 പേരടങ്ങുന്ന കേരളത്തിലെ ആദ്യത്തെ സ്ത്രീ അഗ്നിശമന സേന

- ശ്യാമ

ആണുങ്ങൾ മാത്രം ചെയ്തിരുന്ന ജോലി എന്നൊരു ചിരപരിചിത സംവിധാനത്തിനാണ് ഇനി മുതൽ മാറ്റം വരുന്നത്. ഫയർമെൻ എന്നു മാത്രം പറഞ്ഞു ശീലിച്ച നമുക്കിനി അതു മാറ്റിപ്പറയാം. കേരളത്തിൽ ആദ്യമായി അഗ്നിശമന സേനയിലേക്കു സ്ത്രീകളെത്തിയിരിക്കുന്നു.

2023 സെപ്റ്റംബർ നാലിന് ആദ്യമായി തുടങ്ങിയ സ്ത്രീകളുടെ ആദ്യ ബാച്ച് 150 പ്രവൃത്തിദിവസങ്ങളുടെ പരിശീലനം കഴിഞ്ഞു നാട്ടിലെ ആദ്യ പെൺ അഗ്നിശമന സേനാ പ്രവർത്തകരാകാനുള്ള ഒരുക്കത്തിലാണ്. മാറ്റി നിർത്തലിന്റെ കാലം പതുക്കെ കെട്ടടങ്ങുന്നതിന്റെ സന്തോഷത്തോടെ നമുക്ക് അവരെ കുറിച്ചു കൂടുതലറിയാം.

 തൃശൂർ ഫയർ ആന്റ് റെസ്ക്യൂ സർവീസ് അക്കാദമിയുടെ ഹാൾ നിറയെ പുതിയതായി പഠിച്ചിറങ്ങിയ ആ പെൺകൂട്ടം നിറഞ്ഞു നിൽക്കുന്നു. അവസാന പരീക്ഷയും കഴിഞ്ഞ് അവർ വീടുകളിലേക്കു മടങ്ങുന്ന ദിവസം. അക്കാദമിയിലെ മുഴുവൻ പരിശീലനവും കഴിഞ്ഞ് ഇനി ബാക്കിയുള്ള സ്റ്റേഷൻ ഓഫിസ് പരിശീലനം മാത്രം.

ഒരു ഫയർ വുമണായി ആവശ്യക്കാരുടെ ഫോൺവിളികൾ എടുക്കുക, സ്റ്റേഷനിൽ ചെയ്യേണ്ട ജോലികൾ കൃത്യമായി ചെയ്യുക എന്നതൊക്കെയാണു സ്റ്റേഷൻ ട്രെയിനിങ്ങിൽ നടക്കുക. 2024 സെപ്റ്റംബറോടെ ആ പരിശീലനവും പൂർത്തിയാകും. ശേഷം കേരളത്തിലെ പല അഗ്നിശമന സേനാ വിഭാഗങ്ങളിലേക്കും അവരെത്തും. ആകെയുണ്ടായിരുന്ന 100 ഒഴിവിലേക്കു നിലവിൽ പരിശീലനം കഴിഞ്ഞ് ഇറങ്ങുന്നത് 82 പേരാണ്.

പല വിഷയങ്ങൾ പല പാഠങ്ങൾ