ആരൽവായ്മൊഴിയിലെ മന്ത്രിക്കുന്ന കാറ്റ്..

കേരളത്തിൽനിന്ന് അടർന്നുപായ പഴയ നാഞ്ചിനാടിനെ തമിഴ്നാടിന്റെ തിരുനെൽവേലിയുമായി വേർതിരിക്കുന്ന സഹ്യപർവതത്തിന്റെ  അവസാന മുനമ്പാണ് ആരൽവായ്മൊഴി. മിത്തുകളും ഐതിഹ്യവും ഉറങ്ങിക്കിടക്കുന്ന നാഞ്ചിനാട്ടിലൂടെ ആരൽവായ്മൊഴിയിലേക്ക്

- ARUN P GOPI

കന്യാകുമാരി ജില്ലയിലെ തോവാള, അഗസ്തീശ്വരം, കൽക്കുളം താലൂക്കുകൾ ഉൾപ്പെട്ട നാഞ്ചിനാട് പഴയ തിരുവിതാംകൂറിന്റെ ഭാഗമായിരുന്നു. പച്ചവിരിച്ച നെൽപ്പാടങ്ങൾ നിറഞ്ഞ ഭൂപ്രദേശം കാർഷിക സംസ്കൃതിയാൽ സമ്പന്നമാണ്. പാർവ്വതിപുരം എത്തുന്നതിനുമുൻപേ ദൂരേ വലിയ പാറക്കൂട്ടങ്ങൾ നിറഞ്ഞ വേളിമലയുടെ സുന്ദരദൃശ്യം പ്രത്യക്ഷമാകും. വേളിമല പിന്നിടുമ്പോഴൊക്കെ ആ കുന്നിൻ ചെരിവുകളിലെ കാടുകൾ കഥപറയും. നാഞ്ചിനാട്ടിൽ നിറയെ യക്ഷികളായിരു ന്നുവത്രേ... തേരടി ഇശക്കി, വാകയാട് ഇശക്കി, കൈയിൽ ചോരക്കുഞ്ഞുമായി വന്ന് ചുണ്ണാമ്പ് ചോദിച്ച പഞ്ചവൻകാട്ടുനീലി... എത്രയെത്ര ഐതിഹ്യങ്ങൾ. എണ്ണിയാലൊടുങ്ങാത്ത ഇശക്കിയമ്മൻ കോവിലുകൾ നാഞ്ചിനാട്ടിലുണ്ട്. ആടി മാസത്തിൽ താഴ്വരകളിൽ മഞ്ഞപ്പൊടിയും കളഭവും സിന്ദൂരവും അണിഞ്ഞ് നിശ്ശബ്ദതയുടെ പുറന്തോട് പൊട്ടിച്ച് നാട്ടുദൈവങ്ങൾ മണ്ണിലേക്കിറങ്ങും. വായിച്ചതും കേട്ടറിഞ്ഞതുമായ കഥകൾ. നാഗർകോവിൽ പിന്നിടുമ്പോഴേക്കും വേ ളിമല അപ്രത്യക്ഷമായി കിഴക്ക് ആരൽ വായ്മൊഴി മലനിരകൾ പ്രത്യക്ഷമാകും.

ആടിമാസത്തിലായിരുന്നു തിരുവനന്തപുരത്തുനിന്ന് യാത്രതിരിച്ചത്. രണ്ടരപ്പതിറ്റാണ്ടിനിടെ നാഞ്ചിനാടിന്റെ ഭൂപ്രകൃതിയിലും മാറ്റം സംഭവിച്ചിരിക്കുന്നു. ഇടവപ്പാതി കേരളത്തിൽ പെയ്യുമ്പോൾ അതിന്റെ തുടർച്ച നാഞ്ചിനാട്ടിൽ ലഭിക്കില്ല. നെടുമങ്ങാടു മുതൽ ഭൂതപ്പാ ടിവരെ നീണ്ടുകിടക്കുന്ന മലമടക്കുകളിലെ കാടുകൾ വെളുപ്പിക്കപ്പെട്ടതാണ് ഈ കാലാവസ്ഥാവ്യതിയാനത്തിന് കാരണമെന്ന് പ്രകൃതിനിരീക്ഷകർ പറയുന്നു. ആടിമാസത്തിലെ ചാറ്റൽമഴ നാഞ്ചിനാട്ടിൽ നിന്ന് അപ്രത്യക്ഷമായിരിക്കുന്നു. പകരം ക്ഷോഭത്തോടെ കാറ്റുവീശുന്നു. ആ വേഗത്തെ കാറ്റാടികളുപയോഗിച്ച് വൈദ്യുതിയാക്കുകയാണ് വൻകിട കമ്പനികൾ, നാഗർകോവിൽ പിന്നിട്ടുകഴിഞ്ഞാൽ ആരൽ വായ്മൊഴി മലയുടെ താഴ്വാരം വരെയുള്ള കുനിൻചെരിവുകളിൽ നിറയെ കാറ്റാടിപ്പാടങ്ങളാണ്. നാഗർ കോവിലിൽ നിന്ന് അരമണിക്കൂർകൊണ്ട് ആരൽ വായ് മൊഴിയിലെത്താം. കിഴക്ക് പശ്ചിമഘട്ടമലനിരകൾ പാതയ്ക്ക് സമാന്തരമായി തലയുയർത്തി നിൽക്കുന്നു. പശ്ചിമഘട്ടത്തിന്റെ തെക്കേയറ്റത്തുള്ള വിടവാണ് ആരാമൊഴി മല നിരകൾ. ആരൽ വായ്മൊഴിയെന്ന ചെറിയ ഗ്രാമത്തിലെത്തുമ്പോൾ മലനിരകൾ നേർത്ത് ചുരംപാതയാകുന്നു. നാഗർകോവിലിൽനിന്ന് മധുരയിലേക്കും ചെന്നൈയിലേക്കുമുള്ള പ്രധാന ഹൈവേ കടന്നുപോകുന്നത് ഈ പാതയിലൂടെയാണ്.