தென் ஆபிரிக்க வெள்ளையர்களை அதிகமாக வரவேற்கும் ட்ரம்ப்

தென் ஆபிரிக்காவிலிருந்து அமெரிக்காவுக்கு மீள்குடியேற்றத்துக்காக அகதிகளாகச் சென்ற வெள்ளையினத்தவர்களின் முதல் குழுவினரை டொனால்ட் ட்ரம்ப் நிர்வாகம் கடந்த திங்கட்கிழமை (12) வரவேற்றது.

- 

ஆப்ரிகானர்' எனும் மேற்படி வெள்ளையினத்தவர்கள், தென் ஆபிரிக்காவில் இனப்படுகொலையினால் பாதிக்கப்பட்டவர்கள் என அமெரிக்க ஜனாதிபதி டொனால்ட் ட்ரம்ப் கூறுகிறார்.

59 பேர் கொண்ட மேற்படி குழுவினரை வாஷிங்டன் டி.சி. நகரின் டல்லஸ் சர்வதேச விமான நிலையத்தில் அமெரிக்காவின் பிரதி இராஜாங்கச் செயலார் கிறிஸ் லாண்டோ நேரில் வரவேற்றார்.

வெளிநாடுகளிலிருந்து புதிதாக அமெரிக்காவுக்கு குடியேறுபவர்கள் மற்றும் புகலிடம் கோருவோருக்கு எதிரான கடுமையான நிலைப்பாட்டைக் கொண்டவராக டொனால்ட் ட்ரம்ப் காணப்படுகிறார். இரண்டாவது தடவையாக அவர் ஜனாதிபதியாக பதவியேற்றவுடன் பல்வேறு நாடுகளைச் சேர்ந்த ஆவணங்களற்ற குடியேற்றவாசிகளை பலவந்தமாக விமானங்களின் மூலம் நாடுகடத்த அவர் உத்தரவிட்டார்.

ஆனால், தென் ஆபிரிக்காவைச் சேர்ந்த ஆப்ரிகானர்கள் எனும் வெள்ளையினத்தவர்களுக்கு ட்ரம்ப் நிர்வாகம் அகதி அந்தஸ்து வழங்க முன்வந்துள்ளமை சர்ச்சையை ஏற்படுத்தியுள்ளது.

வெள்ளை ஆப்ரிகானர்கள்

ஆப்ரிகானர்கள் (Afrikaners) எனப்படுபவர்கள் 1652 ஆம் ஆண்டின்பின் பிரதானமாக நெதர்லாந்திலிருந்து (ஒல்லாந்து) தென் ஆபிரிக்காவில் குடியேறியவர்களின் பரம்பரையைச் சேர்ந்த வெள்ளையினத்தவர்களில் ஒரு பகுதியினர். அவர்கள் டச்சு மொழியை அடிப்படையாகக் கொண்ட ஆப்ரிகன்ஸ் எனும் மொழியை பேசுபவர்கள். தென் ஆபிரிக்காவில் சிறுபான்மையினராக இருந்தபோதிலும் பெருமளவு நிலங்களையும் அரசியல், பொருளாதாரத்தையும் அவர்கள் தமது கட்டுப்பாட்டில் வைத்திருந்தனர்.

பிரித்தானிய குடியேற்றவாசிகளின் வாரிசுகளான ஆங்கிலம் பேசும் வெள்ளையினத்தவர்களும் தென் ஆபிரிக்காவில் உள்ளனர்.

தென் ஆபிரிக்க மக்கள் தொகையில் இருவகை வெள்ளையர்கள் சுமார் 20-25 சதவீதமாக இருந்தபோதிலும் பெரும்பான்மையான கறுப்பினத்தவர்களுக்கான உரிமைகளை நிராகரித்த, வெள்ளையர்களின் கொடூரமான நிறவெறி ஆட்சி, 1948 முதல் 1990களின் முற்பகுதி வரை நிலவியது. மேற்படி வெள்ளையர்களில் சுமார் 60 சதவீதமானோர் ஆப்ரிகானர்கள் தான். அவர்களே நிறவெறி ஆட்சியிலும் ஆதிக்கம் செலுத்தினர்.