ఆయుధ దాహం..అవనికి శాపం

జానెడు పొట్టకు గుప్పుడు మెతుకులు చాలు ఆకలి తీర్చుకోవడానికి. కొద్దిపాటి ఆహారంతో సమసిపోయే క్షుద్భాద కోట్లకొలది సంపద కోరుకుంటుందా? సామ్రాజ్యాలను కొల్లగొట్టమని చెబుతుందా? యుద్ధాలతో రక్తపాతం సృష్టించమని చెబుతుందా? అణ్వాయుధాలతో జన హననం చేయమని చెబుతుందా?

- సుంకపల్లి సత్తిరాజు

ఎంత కాలం ఈ అలజడులు? ఎందుకోసం ఈ యుద్ధాలు? ఇతర దేశాలనుకబళించాలని పరాయి దేశాలు ప్రయత్నిస్తే చర్యలను ధీటుగా తిప్పికొట్టడం సముచితం. దేశ భక్తి, ఆత్మాభిమానం, సార్వభౌమత్వ పరిరక్షణ అన్ని దేశాలకు అవసరమే.కానీ తమ దేశమే గొప్పదని, తమ మాటే శాసనమని హూంకరించడం నియంతృత్వమే అవుతుంది. అమెరికా లాంటి దేశాలు అహం అనే పునాదులపై నిర్మింపబడి, అగ్రరాజ్యమనే హోదాతో ఇతర దేశాలను లొంగదీసుకోవడానికి ప్రయత్నించడం ఆక్షేపణీయం. అగ్రరాజ్యాలు తమ వద్ద ఇబ్బడి ముబ్బడిగా ఆయుధాలను సమకూర్చుకుంటూ, అణ్వాయుధాలను పెంచుకుంటూ తమ రక్షణ వ్యవస్థలను పటిష్టం చేసుకోవడానికి ప్రయత్నించడంలో లేని తప్పు ఇతర దేశాలు శతృదేశాల నుండి తమను తాము కాపాడుకోవడానికి తమ రక్షణ సామర్థ్యాన్ని పెంచుకోవడంలో తప్పులు వెదకడం భావ్యమా? ఆయుధ వ్యాపారం మొదలు పెట్టింది. అగ్రరాజ్యాలు కాదా? ఒకప్పుడు ఇరాన్, ఇరాక్లకు ఆయుధ, ఆర్థిక సహకారం అందించిన అమెరికా తర్వాత కాలంలో అమెరికాకు ఎదురు తిరిగిన ఇరాక్ ను నాశనం చేసి, సద్దాం హుస్సేన్ను హతమార్చిన సంగతి మరువలేం.

ఇజ్రాయిల్ -ఇరాన్లు ప్రస్తుతానికి శాంతించినా, ఇరు దేశాల మధ్య కాల్పుల విరమణ ఒప్పందం కుదిరినా మధ్య ప్రాచ్యం మారణహోమం నుండి పూర్తిగా బయట పడలేదనే చెప్పాలి.

పూర్తి స్థాయిలో శాంతి ఒప్పందం కుదిరితేనే పరిస్థితులు కుదుట పడగలవు. ఇరాన్, ఇజ్రాయిల్లు సమీప భవిష్యత్తులో తిరిగి సంఘర్షణాత్మక పంథాలో పయనించబోవనే నమ్మకమైతే లేదు. ఇరు దేశాలు కాల్పుల విరమణకు ముందు పరస్పరం భీకర దాడులు చేసుకున్నాయి. ఇరాన్-ఇరాక్ ల మధ్య కాల్పుల ఒప్పందం కుదిరినట్టు ట్రంప్ ప్రకటించడంతో పశ్చిమాసియాలో తాత్కాలిక శాంతి వాతావరణం నెలకొంది.

అమెరికా జోక్యం అవసరమా?