குறைசொல்வோரைப் புறக்கணிக்கும் தனித்துவக் கலைஞர்

பெரும்பாலும் வயலின், பியானோ, கித்தார் போன்ற இசைக்கருவிகளை வாசிக்கும் பெண்களுக்கு மத்தியில் நாதஸ்வரக் கலைஞர் என்ற தனித்துவமிக்க பாதையைத் தேர்ந்தெடுத்தார் குமாரி அஞ்சலி கதிரவன், 31. பொதுவாக ஆண்கள் ஆதிக்கம் செலுத்தும் இக்கலையில் பெண்கள் அரிதாகவே காணப்படுகின்றனர். ஆனால், மலேசியாவின் சிலாங்கூர் மாநிலத்தைச் சேர்ந்த குமாரி அஞ்சலிக்கு அது ஒருபோதும் தடையாக இருந்ததில்லை. சொல்லப்போனால், அதுவே தம்மை நாதஸ்வரம் கற்றுக்கொள்ளத் தூண்டியதாகக் கூறினார் குமாரி அஞ்சலி.

- ஷர்வேஸ்வரி சரவணன்

இசைக் குடும்பத்தில் பிறந்து வளர்ந்த அவர், கேள்வி ஞானத்தில் ஏழு வயதிலிருந்தே ஒரு பாடகியாக வலம் வந்துள்ளார்.

பல்லூடகப் படைப்பாற்றல் கல்வியில் பட்டயம் பெற்ற குமாரி அஞ்சலிக்கு எப்போதும் இசைமீது தனி நாட்டம் இருந்துவந்துள்ளது. அதன் வெளிப்பாடாக அகரம் இசைப்பள்ளியையும் அவர் நிறுவினார்.

தமது 20வது வயதில் தமிழ்நாட்டின் சிதம்பரத்திலுள்ள அண்ணாமலைப் பல்கலைக்கழகத்தில் இசையை முறைப்படி, இன்னும் ஆழமாகக் கற்றுக்கொள்ள முடிவெடுத்தார்.

மனிதக் குரலின் நுணுக்கங்களைக் களை வெளிப்படுத்தும் நாதஸ்வரம் ஒரு கடுமையான ஆசான் எனலாம். அது, ஒரு பாடகருக்குக் குரலை வலிமையுடனும் துல்லியத்துடனும் வெளிப்படுத்தக் கற்றுக்கொடுக்கும்.

எனவே, ஒரே கல்லில் இரண்டு மாங்காய் அடித்தது போல அதே பல்கலைக்கழகத்தில் வாய்ப்பாட்டுடன் நாதஸ்வரத்தையும் கற்றுக்கொள்ள குமாரி அஞ்சலி முடிவுசெய்தார். “குடும்பத்தினர் முதலில் தயங்கினாலும் என் விருப்பத்திற்கு இணங்க என்மீது நம்பிக்கை வைத்து இந்தியாவுக்கு வழியனுப்பினர்,” என்ற குமாரி அஞ்சலி, தம் பெற்றோரின் ஊக்குவிப்பால் முதன்முறையாக இந்தியாவிற்குச் சென்றார்.

“நாதஸ்வரம் கற்கப்போகிறேன் என அஞ்சலி என்னிடம் சொன்னபோது, எனக்கு அதிர்ச்சியாக இருந்தது.

“அங்கு பல இடர்ப்பாடுகளையும் சவால்களையும் அவர் சந்தித்தார். பலமுறை மனம் தளர்ந்து மலேசியாவுக்கே திரும்பவும் அவர் எண்ணினார். ஆனால், அப்படி நிறுத்திவிட்டால் பெற்றோரிடமும் 'உன்னால் சாதிக்க முடியாது' என வசை பாடியோரிடமும் என்ன சொல்வது என்ற எண்ணம் அவரை அந்த இசைக்கருவியைத் தொடர்ந்து கற்றுக்கொள்ளச் செய்தது,” என்றார் குமாரி அஞ்சலியின் தந்தையார் கே.எஸ். கதிரவன், 60.

அங்கு ஐந்தரை ஆண்டுகள் செலவிட்டு திருக்களர் துரை பாரதிதாசன் போன்ற அனுபவம் வாய்ந்த குருமார்களிடம் குமாரி அஞ்சலி நாதஸ்வரம் கற்றுக்கொண்டார்.