கதி கலங்க வைக்கும் ‘வெள்ளிக்கிழமை’

சட்டம் அனைவருக்கும் சமம், ஊழல், மோசடி செய்த, குற்றங்கள் புரிந்த அரசியல்வாதிகள் எத்தரத்தில் இருந்தாலும் சிறை செல்வார்கள் என்று கூறி மீண்டும் கைது வேட்டையை ஆரம்பித்துள்ள அனுரகுமார அரசு முன்னாள் ஜனாதிபதி ரணிலாலும் கை வைத்துள்ளதுடன், 'வெள்ளிக்கிழமை கைது'களை ஆரம்பித்துள்ளதால் வெள்ளிக்கிழமை என்றாலே முன்னாள் அரசியல் வாதிகள் கதி கலங்கும் நிலைமை ஏற்பட்டுள்ளது.

- முருகானந்தம் தவம்

அதுமட்டுமன்றி, கைதுக்கு 'வெள்ளிக்கிழமை' நாள் குறிக்கப்படுவதனால் இக்கைதுகள் அரசியல் பழிவாங்கலை நோக்காகக் கொண்ட கைதுகள் என்ற குற்றச் சாட்டுக்களும் எழுந்துள்ளன.

ஒருவர் வெள்ளிக்கிழமை விசாரணைக்கு அழைக்கப்பட்டு, மாலை நேரத்தில் கைது செய்யப்பட்டால் அவர் நீதிமன்றத்தில் ஆஜர்செய்யப்படும்போது, நீதிமன்றம் பெரும்பாலும் அவருக்குப் பிணை வழங்காது. ஆகக்குறைந்தது திங்கட்கிழமை வரை விளக்கமறியலில் வைக்குமாறே உத்தரவிடும். சனி, ஞாயிறு தினங்களில் நீதிமன்றங்கள் செயற்படாது. இத்தினங்களில் கைதாவோர் நீதிபதிகளின் வாசஸ்தலங்களுக்குக் கொண்டு செல்லப்பட்டு ஆஜர்படுத்தப்படுவார்கள். அவ்வாறு ஆஜர்படுத்தப்படுவோருக்கு இத்தினங்களில் பிணை வழங்க முடியாது. அவர்களும் விளக்க மறியலில்தான் வைக்கப்படுவார்கள். ஆகவேதான், வெள்ளிக்கிழமை ஒருவரை கைது செய்து நீதிமன்றங்களில், ஆஜர்படுத்தும்போது, அந்நபர் ஆகக்குறைந்தது 4 தினங்களாவது விளக்க மறியலில் இருந்தாக வேண்டும்.

அவ்வாறானதொரு பழிவாங்கும் உணர்விலேயே எப்படியாவது 4 தினங்களாவது சிறையில் வைத்திருக்க வேண்டும் என்பதற்கு நன்கு திட்டமிட்டே முன்னாள் ஜனாதிபதி ரணில், 'வெள்ளிக்கிழமை' கைது செய்யப்பட்டுப் பிணை கிடைத்து விடக்கூடாது என்பதற்காக நீண்ட தாமதத்தின் பின்னர் நீதிமன்றம் கொண்டு செல்லப்பட்டு அங்கும் திட்டமிட்ட மின்தடையை ஏற்படுத்தி வழக்கு விசாரணையை மேலும் தாமதப்படுத்தி அவரை திங்கட்கிழமை வரையில் சிறையில் அடைத்து அனுரகுமார அரசு திருப்தியடைந்தது. அதே 'வெள்ளிக்கிழமை' கைதுகள் தான் தற்போது தொடர்ந்தும் முன்னெடுக்கப்படுகின்றன.

இந்த கைது வேட்டையில் பொதுஜன பெரமுனவின் முன்னாள் அமைச்சரும் ராஜபக்ஷக்களின் தீவிர விசுவாசியுமான ஜோன்ஸ்டன் பெர்னாண்டோ சிக்கினார். குற்றப்புலனாய்வு திணைக்களத்துக்கு விசாரணைக்கு அழைக்கப்பட்டு கைது செய்யப்பட்டார். பின்னர் பிணையில் வெளியில் வந்தார். அடுத்த அதிரடியாகப் பொதுஜன பெரமுனவின் முன்னாள் அமைச்சரான அனுர பிரியதர்சன யாப்பாவை அவரது மனைவியுடன் அனுரகுமார அரசு அதிரடியாகக் கைது செய்து அதிர்ச்சி கொடுத்தது. பின்னர் அவர்களும் பிணையில் வெளியே வந்தனர்.