સરકારી શાળાનાં બાળકોને કૂતરું કરડે ત્યારે શું કરવું-કેવી રીતે બચવું? તેની તાલીમ અપાશે

વિધાર્થીઓ માટે ‘શ્વાન જાગૃતિ’ તાલીમનો પ્રારંભ

- 

અમદાવાદ શહેરમાં રખડતાં કૂતરાંના વધતા આતંકની ઘટનામાં સતત વધારો થઇ રહ્યો છે. આ માટે સરકારી શાળાની દીવાલો ઊંચી લેવી અથવા જે શાળાની દીવાલ તૂટી ગઈ હોય ત્યાં નવું તાર ફેન્સિંગ કરાવવું વગેરે આદેશ અને કૂતરાં સામે રક્ષણ માટે સાવચેતીનાં પગલાં લેવા માટે તંત્ર દ્વારા જાણ કરાઈ છે, પરંતુ નાનાં બાળકો પરના વારંવારના હુમલાની ગંભીર ઘટનાએ શિક્ષણ વિભાગને જાગવા માટે મજબૂર કર્યો છે. હવે શહેરની સરકારી પ્રાથમિક, માધ્યમિક અને ઉચ્ચતર માધ્યમિક શાળાઓમાં નિયમિત અભ્યાસની સાથે-સાથે શ્વાન જાગૃતિનું વિશેષ પ્રશિક્ષણ શરૂ કરવામાં આવ્યું છે, જેથી બાળકો શ્વાનના હુમલાનો ભોગ ન બને અને છતાં ક્યારેક શ્વાન ક૨ડી જાય તો તાત્કાલિક શું કરવું તેની જાણકારી મેળવી શકે. આજકાલ કૂતરાં કરડવાનો ભય લોકોમાં વધી ગયો છે. દરરોજ કૂતરું કરડવાના સમાચાર પ્રકાશમાં આવી રહ્યા છે. રખડતાં કૂતરાં માસૂમ બાળકોને કરડે છે અથવા તેમના પર હુમલો કરે છે. થોડા સમય પહેલાં પણ શહેરમાં રખડતાં કૂતરાં દ્વારા એક માસૂમ બાળકને કરડીને મારવાનો કિસ્સો પ્રકાશમાં આવ્યો હતો. શેરીનાં કૂતરાં ખૂબ જ આક્રમક બની ગયાં છે.