Evergreens mik weer hoog

As die verdedigende SWD Super A-ligakampioen is Evergreens se doelwit vir die nuwe seisoen glashelder: om weer die beker omhoog te hou en terselfdertyd te wys dat die Green Machine ook buite die plaaslike verhoog kan presteer.

- Hugo Redelinghuys

Leighton van Wyk (met bal), voorspeler van Evergreens, gaan vanjaar sy rugbyloopbaan in Spanje voortsit en is dus vir Pacaltsdorp se spogspan verlore.

(Foto: Hugo Redelinghuys)

Só het Deon Stoffels, voorsitter van Evergreens, die klub se ambisie en voorbereiding vir die seisoen wat voorlê opgesom. “Ons wil die titel suksesvol verdedig, maar ons is deeglik bewus daarvan dat ons nou in die visier is. Die ander spanne gaan sterker en deegliker voorberei - en dit beteken ons sal ons sokkies moet optrek,” erken hy.

Volgens Stoffels is strawwer kompetisie egter geen slegte ding nie. “Ek verwelkom dit. Op die langtermyn gaan dit die standaard van SWD-rugby net verder lig. In die Super A-liga is daar eenvoudig nie klein of groot wedstryde nie - elke week is 'n toets.”

Hy verwag veral sterk teenstand van Heidelberg, wat volgens hom oor die afgelope drie seisoene net so maklik kampioen kon gewees het, asook Groot-Brakrivier, Progress, Barbarians en Bridgton, wat almal as gedugte teenstanders beskou word.