Koos werk nog volstoom op 83

Op 83 is Suid-Afrika se bekende filmman, Koos Roets, reeds 64 jaar in die filmbedryf en nog volstoom agter die kameras en op filmstelle.

- Hannes Visser

Hy het in 1962 as kamera-assistent by Jamie Uys begin werk, en sy eerste groot deurbraak as kameraman was met Die Geheim van Nantes. Daarna was hy kameraman van talle films van Jans Rautenbach en Katinka Heyns en ook talle TV-reekse met Heyns as regisseur.

Van hierdie films en TV-reekse was onder andere Pappalap, Jannie Totsiens, Abraham, Paljas, Die Wonderwerker, Onder Draai die Duiwel Rond en Feast of the Uninvited.

Hy het later besluit om sy eie films te maak, en films soos Die Erfgenaam, Vlug van die Seemeeu, Sersant en die Tiger Moth en Kootjie Emmer het gevolg. Hy was ook die regisseur van films soos Die Groen Faktor, Daar kom Tant Alie en die televisiereekse Koöperasiestories en Manakwalanners.

Wat hy egter die meeste geniet, is om draaiboeke te verwerk, soos byvoorbeeld die teaterstuk, Faan se trein, wat hy as rolprent verwerk het. Dan was daar ook Jeanne Goosen se 'n Pawpaw vir my Darling, wat hy vir die silwerskerm verwerk het.