Hof beslis onnie se ontslag was onbillik

Vyf jaar nadat Gaye Raubenheimer, 'n voormalige onderwyseres van Pacaltsdorp Sekondêr, afgedank is, het die arbeidshof haar ontslag van 2019 as substansieel onbillik verklaar.

- Lizette da Silva

Regter RN Daniels het op 2 Desember uitspraak gelewer. Raubenheimer is op 24 April 2019 ontslaan ná 'n tugverhoor waarin aangevoer is dat sy op 25 Mei 2018 "vernederende taal teenoor 'n leerder gebruik" het. Sy het onskuldig gepleit.

Sy het teen die ontslag geappelleer, en toe dit onsuksesvol was, het sy die geskil oor die billikheid van haar ontslag na die Raad op Arbeidsverhoudinge in die Onderwys (Ravo) verwys. Die arbitrasie het van September 2019 tot September 2020 plaasgevind, en die kommissaris het destyds bevind dat die Wes-Kaapse departement van onderwys (WKOD) sy saak op die balans van waarskynlikhede bewys het en dat die ontslag substansieel billik was.

"My menswaardigheid is aangetas en my professionele integriteit in twyfel getrek. Ek was in die media voorgestel asof ek skuldig was, al het ek die uitslag op hersiening geneem."

Op hersiening het die arbeidshof egter die arbitrasiebevel van Ravo tersyde gestel.