Wie hou wag oor George se paaie?

"Waar is ons spietkops as die son sak?" vra 'n inwoner van George.

- Lizette da Silva

"Nee," sê 'n ander, "het julle nie gehoor nie?

"Ons munisipale verkeersbeamptes werk nou slegs op weeksdae tussen 06:00 en 18:00. Dis nou in twee skofte, van 06:00 tot 15:00 en van 09:00 tot 18:00."

Raar maar waar ... buiten sekere uitsonderings soos betaalde begrafnisbegeleidings, is daar tans geen munisipale verkeersbeamptes op George se paaie ná 18:00 of oor naweke nie.

George Herald het die afgelope tyd verskeie klagtes van inwoners ontvang wat bekommerd is oor dié tydgleuf waarin verkeersbeamptes nie sigbaar is nie, veral in die lig van toenemende padongelukke, meestal kleiner ongelukke (fender benders) in die dorp. Inwoners kla ook dat die tientalle padwerke motoriste frustreer en hulle dan onverskillig ry.

"Jy sien al meer en meer hoe motoriste kanse vat want hulle is ongeduldig omdat hulle lank in die verkeer moet sit. Ons weet ook hoe mense veral saans en oor naweke onder die invloed bestuur. Hoe is dit dat ons munisipaliteit nie sorg dat daar verkeersbeamptes op die pad is nie?" sê een inwoner.