பேரவையிலிருந்து அதிமுக உறுப்பினர்கள் இரு முறை வெளிநடப்பு

இரு வேறு பிரச்னைகளை முன்வைத்து, அதிமுக உறுப்பினர்கள் செவ்வாய்க்கிழமை சட்டப்பேரவையிலிருந்து இரண்டு முறை வெளிநடப்பு செய்தனர்.

- 

சென்னை, ஏப். 8:

சட்டப்பேரவையில் செவ்வாய்க்கிழமை நேரமில்லா நேரத்தில், எதிர்க்கட்சித் தலைவர் எடப்பாடி கே.பழனிசாமி எழுந்து முக்கியப் பிரச்னையை எழுப்ப அனுமதி வேண்டும் என்றார்.

இதற்கு உடனடியாக அனுமதி மறுத்த பேரவைத் தலைவர் மு.அப்பாவு, பாமக குழுத் தலைவர் ஜி.கே.மணி ஒரு முக்கியப் பிரச்னையை எழுப்ப அனுமதி கேட்டுள்ளார். அவர் பேசி முடித்த பிறகு பேசலாம் என்றார்.

இதற்கு அதிமுக உறுப்பினர்கள் கடுமையாக எதிர்ப்பு தெரிவித்தனர். ஆனாலும் அனுமதி மறுத்த பேரவைத்தலைவர், உங்களது கட்சியினர் (அதிமுக) காலை 9.20 மணிக்கு வந்துதான் அனுமதி கேட்டனர். பிறகு அனுமதி அளிக்கிறேன் என்றார்.

அப்போது குறுக்கிட்ட அவை முன்னவர் துரைமுருகன், எதிர்க்கட்சித் தலைவர் என்ன சொல்கிறார் எனக் கேட்ட பிறகு தீர்ப்பைச் சொல்லுங்கள். பேசுவதற்கே விடாவிட்டால், அவர்கள் என்ன சொல்ல வருகிறார்கள் என்று எப்படித் தெரியும் என்றார்.

அவை முன்னவருக்கு நன்றி: அவை முன்னவரின் கருத்தையும் ஏற்காத பேரவைத் தலைவர், காலை 9.20 மணிக்குத்தான் எதிர்க்கட்சி கொறடா நேரில் வந்து அனுமதி கேட்டார். ஜி.கே.மணி பேசிய பிறகு எதிர்க்கட்சியினர் பேசலாம் என்றதும் அதிமுக உறுப்பினர்கள் கடுமையாக எதிர்ப்பு தெரிவித்தனர்.

அப்போது பேசிய எதிர்க்கட்சித் தலைவர் எடப்பாடி கே.பழனிசாமி, பிரதான எதிர்க்கட்சியான நாங்கள் சொல்வதைக் கேட்டுவிட்டு பதில் சொல்லுங்கள். பாமகவுக்கு வாய்ப்புக் கொடுங்கள். நாங்கள் எந்தத் தடையும் சொல்லவில்லை என்றார்.

இதை ஏற்றுக் கொண்ட அவை முன்னவர் துரைமுருகன், எதிர்க்கட்சித் தலைவருக்குத்தான் முதல் மரியாதை கொடுக்க வேண்டும். அவர் என்ன சொல்ல வருகிறார் என்பதை அறிய பேசவிடுங்கள். அதன்பிறகு என்ன முடிவெடுக்க வேண்டுமோ அதை எடுங்கள் என்றார்.