அவாமி லீக்கை தடை செய்தது ஜனநாயக விரோதம்

வங்கதேச முன்னாள் பிரதமர் ஷேக் ஹசீனா

- 

'அவாமி லீக் கட்சியை வங்கதேச இடைக்கால அரசு தடை செய்தது சட்டவிரோதம்; வாக்காளர்களின் உரிமைக்கு எதிரானது' என அந்த நாட்டிலிருந்து வெளியேறி இந்தியாவில் தஞ்சமடைந்துள்ள அவாமி லீக் கட்சியின் தலைவரும் முன்னாள் பிரதமருமான ஷேக் ஹசீனா தெரிவித்தார்.

மேலும், கடந்த ஆண்டு நடைபெற்ற வன்முறைப் போராட்டத்தின்போது ஆயிரத்துக்கும் மேற்பட்டோர் உயிரிழந்ததற்கு, அந்நாட்டின் அப்போதைய தலைவர் என்ற அடிப்படையில் பொறுப்பேற்பதாகவும் அவர் தெரிவித்தார்.

விடுதலைப் போராட்ட வீரர்களின் வாரிசுகளுக்கு 30 சதவீத இடஒதுக்கீடு வழங்க அவாமி லீக் அரசு எடுத்த முடிவு மற்றும் அரசின் பல்வேறு முறைகேடுகளுக்கு எதிர்ப்பு தெரிவித்து கடந்த ஆண்டு ஜூலை மாதம் நடைபெற்ற மாணவர் போராட்டம், மிகப்பெரிய வன்முறையாக மாறியது. அதைத் தொடர்ந்து, பிரதமர் பதவியை ராஜினாமா செய்த ஷேக் ஹசீனா, அந்நாட்டிலிருந்து வெளியேறி இந்தியாவில் தஞ்சமடைந்தார்.

அதைத் தொடர்ந்து, முகமது யூனுஸ் தலைமையில் அங்கு இடைக்கால அரசு அமைந்தது. இடைக்கால அரசு, ஷேக் ஹசீனாவின் அவாமி லீக் கட்சிக்குத் தடை விதித்ததோடு, ஷேக் ஹசீனா மீது அந்நாட்டு உச்சநீதிமன்றத்தில் முறைகேடு வழக்கு தொடர்ந்துள்ளது.

இந்தச் சூழலில், வங்கதேசத்தில் அடுத்த ஆண்டு தொடக்கத்தில் பொதுத் தேர்தல் நடைபெற உள்ளது.