நாட்டின் மத நம்பிக்கைகள் மீது தொடர் தாக்குதல்

'அடிமை மனப்பான்மை கொண்டவர்கள், அந்நிய சக்திகளின் ஆதரவுடன் நாட்டின் மத நம்பிக்கைகள் மீது தொடர் தாக்குதல் நடத்துகின்றனர்' என்று பிரதமர் நரேந்திர மோடி கூறினார்.

- 

மகா கும்பமேளா குறித்து சில அரசியல் தலைவர்கள் விமர்சன கருத்துகளைத் தெரிவித்த நிலையில், பிரதமர் இவ்வாறு சாடியுள்ளார். 'கோடிக்கணக்கான பக்தர்கள் பங்கேற்றுள்ள மகா கும்பமேளா, ஒற்றுமையின் திருவிழா' என்று அவர் குறிப்பிட்டார்.

மத்திய பிரதேச மாநிலம், சத்தர்பூரில் புற்றுநோய் மருத்துவமனையுடன் கூடிய ஸ்ரீ பாகேஸ்வர் மருத்துவ அறிவியல் மற்றும் ஆய்வு நிறுவனத்துக்கு பிரதமர் மோடி ஞாயிற்றுக்கிழமை அடிக்கல் நாட்டினார். இந்நிகழ்ச்சியில் அவர் பேசியதாவது:

இன்றைய காலகட்டத்தில், நமது மதத்தை ஏளனம் செய்யும் தலைவர்களின் கூட்டம் இருப்பதைக்காண்கிறோம். நாட்டின் ஒற்றுமையைத் தகர்க்கும் நோக்கத்துடன், மக்கள் மத்தியில் பிளவை ஏற்படுத்தும் வேலையில் இக்கூட்டம் ஈடுபடுகிறது.