‘நான் முதல்வன்’ திட்டத்துக்கு அகில இந்திய அளவில் பாராட்டு

தமிழ்நாடு அரசின் ‘நான் முதல்வன்’ திட்டத்துக்கு அகில இந்திய அளவில் பாராட்டு கிடைத்திருப்பதாக துணை முதல்வர் உதயநிதி ஸ்டாலின் கூறியுள்ளார்.

- 

கோவை அரசு தொழில்நுட்பக் கல்லூரியில் உயர் கல்வித் துறை, சிறப்புத் திட்ட செயலாக்கத் துறைகள் சார்பில் புதன்கிழமை நடைபெற்ற நான் முதல்வன் - திறன், வேலைவாய்ப்பு மையங்களின் தொடக்க விழாவில் பங்கேற்று திட்டத்தைத் தொடங்கிவைத்து துணை முதல்வர் உதயநிதி ஸ்டாலின் பேசியதாவது:

தமிழக சட்டப்பேரவையில் வெளியிட்ட அறிவிப்பின்படி ரூ.31 கோடி மதிப்பில் மாநிலம் முழுவதும் 29 இடங்களில் நான் முதல்வன் திட்டத்தின் கீழ் பயிற்சி, திறன் மேம்பாட்டு மையங்கள் அமைக்கப்பட்டுள்ளன. இதன் தொடக்க விழா கோவையில் நடைபெறுகிறது. மாநிலம் முழுவதும் அமைக்கப்பட்டுள்ள 29 மையங்களும் உலகத் தரத்தில் இருக்கவேண்டும் என்பதற்காக 2,900 கணினிகளை வழங்கியுள்ளோம்.