નવું વર્ષ... નવી શરૂઆાત

બીજાનું જોઈ જોઈને સંકલ્પ લેતાં હો તો પણ કમ સે કમ જાત માટે લીધેલાં વચન પૂરાં કરો... કોઈ ભાર રાખ્યા વગર

- ડૉ. અપર્ણા દેશમુખ

નવું વર્ષ નવાં સપનાં અને નવી આશા લઈ આવે છે. ઘણા લોકો આ જ કારણે નવા વર્ષની શરૂઆતમાં પોતાનું શારીરિક અને માનસિક સ્વાસ્થ્ય, કે પછી સામાજિક અને આર્થિક જીવન સુધારવા અમુક સંકલ્પ કરે છે, જે ન્યુ યર રિઝોલ્યુશન તરીકે ઓળખાય છે. અલબત્ત, વર્ષ આગળ વધે એમ ઉત્સાહથી લેવાયેલા આ સંકલ્પો ઠંડા પડતા જાય છે. સંશોધન પ્રમાણે દસથી વીસ ટકા લોકો જ પોતાના સંકલ્પ પૂરા કરવામાં સફળ રહે છે.

આનું શું કારણ હોઈ શકે?

અવાસ્તવિક અપેક્ષાઃ આપણા સંકલ્પોને મામલે ઘણી વાર આપણે વધુપડતા મહત્ત્વાકાંક્ષી કે અવાસ્તવિક થઈ જઈએ છીએ. આવું કરવાથી આપણે પોતાની જાતને જ નિષ્ફળતા તરફ દોરી જઈએ છીએ.

નિયોજનનો અભાવ: સંકલ્પ પૂરા પાડવા આપણે જે જરૂરી પગલાં લેવાનાં હોય એ વિશે વધુ વિચાર કર્યા વિના જ્યારે આપણે કશું નક્કી કરીએ તો એના પૂરા થવાની શક્યતા સ્વાભાવિક રીતે ઓછી જ થઈ જાય છે.

નકારાત્મક સ્વ-વિચારઃ અમુક લોકો સંકલ્પોનું આચરણ કરતાં કરતાં પોતાની જાત પર એટલા કઠોર થઈ જાય છે કે નાની ભૂલોને લીધે પણ એને મોટો ગુનો ગણી શરમની લાગણી અનુભવે છે. થોડા સમય પછી આ લાગણીને સંભાળવી મુશ્કેલ થઈ જાય છે અને સંકલ્પો તૂટવાની શક્યતા વધી જાય છે.