આઈપીએલ-૨૦૨૪માં હિટિંગ ખૂનખાર

સિક્સર આંક ૫૭ મૅચમાં જ ૧૦૦૦ને પાર આ બૉલર્સની ખાજો દયા... આઈપીએલ એટલે આમ તો એન્ટરટેઈનમેન્ટ જ. બૉલર ગમે તે હોય, બૅટર ચારેકોર ફટકાબાજી કરી ટીમનો સ્કોર વધારતો રહે. એમાં પણ આ વખતે તો સૌથી વધુ સિક્સરથી માંડી તોસ્તાન સ્કોરના નવા નવા રેકૉર્ડ્સ બની રહ્યા છે.

- ઉમંગ વોરા

ચોગ્ગા-છગ્ગાની રમઝટ બોલાવતી, મનોરંજનની ગંગા વહેવડાવતી ઈન્ડિયન પ્રીમિયર લીગ (આઈપીએલ) ક્રિકેટસ્પર્ધાએ ક્રિકેટરસિયાઓને ઉનાળા અને ચૂંટણીની ગરમી વચ્ચે ઘેલા ઘેલા કરી દીધા છે. સાથે સાથે રાતના સમયની ટીવીસિરિયલો કે અન્ય મનોરંજક કાર્યક્રમોને મોટા ફટકા ઝીંક્યા છે. ૨૦-૨૦ ઓવરવાળી મૅચની આ ટુર્નામેન્ટ દર વર્ષે ઉત્તેજનાનો પારો વધારતી જ રહે છે. એમાં પણ આ વખતે તો મર્યાદિત ઓવરની મૅચના અનેક રેકૉર્ડ તૂટ્યા છે, ખાસ તો બૅટિંગને લગતા.

આ ફૉર્મેટમાં આમ પણ બૅટર્સનું વર્ચસ હોય છે. છેલ્લાં અમુક વર્ષોથી નામાંકિત વિદેશી ખેલાડીઓની સાથોસાથ કેટલાક ભારતીય નવલોહિયાઓ પણ ધડાધડ સિક્સરો મારીને દર્શકોનું ભરપૂર મનોરંજન કરી રહ્યા છે, પણ આ વર્ષની સ્પર્ધામાં સિક્સરોનો જે ધોધ છૂટ્યો છે એ કંઈક અજબનો છે. ક્રિકેટની રમતમાં આ પ્રકારની ધુલાઈ-પિટાઈ અગાઉ ક્યારેય જોવા મળી નહોતી. હવે તો એવું લાગે છે કે સિક્સર મારવાનો જાણે બૅટર્સ માટે ડાબા હાથનો ખેલ બની ગયો છે. બિચારા બૉલરો માટે માત્ર રડવાનું જ બાકી રહી ગયું છે. ૨૦૨૪ની આઈપીએલમાં સિક્સરોનો જે ધોધમાર વરસાદ જોવા મળ્યો છે એ જોતાં સૌને સવાલ થઈ રહ્યો છે કે ક્રિકેટનું સ્તર કઈ દિશામાં જઈ રહ્યું છે?