લ્યો, લોન લેનારાને બદલે આપનારાની લાઈન મોટી થતી જાય છે!

ફાઈનાન્સ સેક્ટરની અગ્રણી કંપનીઓના નિયમ ઉલ્લંઘન સામે રિઝર્વ બૅન્ક અને સેબી અત્યારે જે ઝડપથી ઍક્શન લઈ રહી છે એ ફાઈનાન્સિયલ માર્કેટમાં ચર્ચાનો વિષય બની છે. ગ્રાહકોની સુરક્ષા અને ફાઈનાન્સિયલ સેક્ટરની શિસ્ત માટે અનિવાર્ય એવી આ ઍક્શનના લેટેસ્ટ કિસ્સા જાણવા-સમજવા જેવા ખરા.

- જયેશ ચિતલિયા

પેટીએમના કિસ્સા બાદ ફાઈનાન્સ સંબંધિત કંપનીઓ સામે નિયમન સંસ્થાઓની નજર બારીક થવા લાગી છે. તાજેતરમાં રિઝર્વ બૅન્ક ઑફ ઈન્ડિયાએ ફાઈનાન્સિયલ સેક્ટરના જૂના અને જાણીતા ગ્રુપની કંપની જેએમ ફાઈનાન્સિયલ પ્રોડક્ટ્સને શૅર્સ, ડિબેન્ચર્સ કે બૉન્ડ્સ સામે ધિરાણ આપવા પર પ્રતિબંધ મૂક્યો છે, કારણ કે આ કંપની જે રીતે ધિરાણ આપે છે એમાં નિયમોનો ગંભીરપણે ભંગ થતો હોવાનું રિઝર્વ બૅન્કે નોંધ્યું છે. આ સાથે કંપનીને આઈપીઓ ફાઈનાન્સની પણ મનાઈ ફરમાવી દેવામાં આવી છે, એ પણ તાત્કાલિક અસરથી. કંપની સામે આઈપીઓ (ઈનિશિયલ પબ્લિક ઑરિંગ)ના છલકાવવા સંબંધી શંકા સાથે એવો આક્ષેપ હોવાની ચર્ચા છે કે એ આઈપીઓનાં સન્સ્ક્રિપ્શન વધારવામાં કંપની કંઈક રમત કરે છે. વધુમાં સેબીએ જેએમ ફાઈનાન્સિયલ પ્રોડક્ટ્સ પર નિર્ધારિત ધોરણોના ભંગના આક્ષેપ સાથે એને ડેટ્સ (ઋણ સાધનો) પબ્લિક ઈશ્યૂઝ મૅનેજ કરવા સામે પણ મનાઈ ફરમાવી છે.

આ ઉપરાંત, નિયમન સંસ્થાએ તાજેતરમાં આઈઆઈએફએલ (ઈન્ડિયા ઈન્ફોલાઈન ફાઈનાન્સ) પર ચોક્કસ નિયમ ઉલ્લંઘન બદલ ગોલ્ડ સામે ધિરાણ આપવાની બંધી મૂકી દીધી છે, જેની અસર ગોલ્ડ લોન આપનારા-લેનારા પર થવા ઉપરાંત શૅરબજારમાં ચોક્કસ સ્ટૉક્સ પર પણ થઈ હોવાનું નોંધાયું છે.

લોન લો, લોન લો, લોન લો...